Oranjestad, ARUBA – Diadomingo dia 29 di september 2019 Fundacion Mi Cutisa (FMC) tambe a participa na Fiesta di Cunucu na Cas Tan Tin, na Pos Abou 19 na Noord. Esaki tabata e di seis biaha cu Stichting Monumentenfonds (SMFA) ta organisa e evento aki. E biaha aki a scohe Cas Tan Tin como e localidad ya cu Monumentenburo a nombra e Cas di Cunucu aki riba e Lista di Monumentonan di Aruba como un edificio proteha. Cas di Tan Tin ta e prome monumento pafo di capital di Aruba y tambe e prome Cas di Cunucu cu ta keda nombra riba e Lista di Monumentonan. FMC ta sumamente orguyoso di por a hunga un rol esencial den proteccion di e cas aki. Cu e nominacion aki un di e soñonan di fundadora di FMC, Sra. Imelda Eckmeyer a bira realidad.
Dia 1 di oktober 2019 a haci exactamente 10 aña cu Sra. Imelda a fayece y prome cu el a muri e tabatin hopi plan, deseo y ideanan cu el a comparti cu directiva di FMC. Ta hopi aña Sra. Imelda tabata core rond di Aruba buskando un Cas di Cunucu na unda FMC un dia lo por bay saca potret di hende den trahe tipico di Aruba. Su deseo tabata di por haya un cas tradicional di Aruba unda cu e ta laga tur hende mira con antes (despues di e epoca di 1900) nos hendenan tabata biba na Aruba. Y ta hopi biaha Sra. Imelda tabata bishita Sra. Faustina “Tina” Tromp, pa motibo cu e tabatin un aprecio masha grandi pa e forma con Tina tabata conserva y mantene su cas, esta manera cu su mayornan a biba den nan cas.
Aunke Sra. Imelda tempo cu e tabata na bida no por a convence Tina cu su cas mester bira un patrimonio cultural nacional, pa asina e futuro generacion semper tin un cas unda nan por mira con nos hendenan a biba antes, su Fundacion Mi Cutisa si, cu ayudo di famia Tromp a logra e meta aki.
Cas Tan Tin lo bay ta habri pa publico den forma di un museo etnografico.
Etnografia ta un ramo di estudio cu ta haci investigacion riba e forma di biba di hende.
Asina por indica e identidad y estilo di biba di un grupo di hende. E ta un forma pa registra y describi historia, costumber, tradicion, mito, creencia, lenguahe, genealogia, etc. di un pueblo. Den un museo etnografico ta expone obheto di nos antepasadonan. Atraves di nan obhetonan y tur loke cu nan a usa y e forma con nan a usa e artefactonan, e publico ta cera conoci cu e cultura y tradicion di un grupo di hende den cierto epoca di nan bida. Cada obheto ta origin di nos cultura. Mayoria bes un museo etnografico ta nace door di un iniciativa priva y despues e ta desaroya bira patrimonio nacional di un pais.
Cas di Tan Tin ta mustra con nos hendenan di cunucu tabata biba antes. Durante Fiesta di Cunucu e pueblo di Aruba por a mira con un famia humilde di Noord tabata biba den nan cas situa pega cu nan cunucu unda ainda tin un mangazina. Tambe tabatin oportunidad pa saca potret den trahe tipico. E tabata un dia sumamente exitoso. FMC ta gradici SMFA cu ta organisa e evento aki pa scohe Cas Tan Tin e aña aki, tur organizacion y instancia cu a participa na e evento aki, un y tur cu a bishita nos cas y muy en particular na tur nos boluntarionan cu a haci e dia aki posibel. Desde 2 di oktober 2019 Cas Tan Tin ta habri dialuna, diaranson y diabierna for di 10.00 or di mainta te cu 3.00 or di atardi. Pa mas informacion por tuma contaco via tel. 587.2005 of via e-mail [email protected]