Apreciabel habitantenan di Simeon Antonio y bisindario,
Dia 1 di october ultimo mi a ricibi un carta di sra. Edwina Henriquez, den cual e ta expresa e desgusto di un grupo di habitante di Simeon Antonio y bisindario contra e ley di Serlimar. Permiti mi pa medio di e carta aki di informa bo riba e Proyecto di ley relaciona cu Serlimar.
Mi por constata cu su carta ta basa riba e hecho cu el a asumi cu e ley di Serlimar cu a wordo discuti den Parlamento diaranson 2 di october, lo ta trata di un incinerator. Esaki no ta corecto.
E ley di Serlimar tin como obhetivo pa garantisa un maneho adecua y integral di desperdicio na Aruba. Esaki ta wordo haci entre otro door di aclarea e ley actual di Serlimar na unda cu e posicion financiero di Serlimar ta wordo fortalece pa asina Serlimar por ehecuta su trabou publico mas eficiente den nomber di pais Aruba. E cambio aki ta necesario pa logra un solucion nacional pa e procesamento sostenibel di desperdicio cu ta inclui e ciere definitivo di e dump na Parkietenbos cu ta sumamente contamina, y mesora cuminsa cu e proceso di sanea y remedia e dump. E proceso di licitacion pa remedia Parkietenbos actualmente ta canando su curso. E resultadonan di e proceso aki lo wordo haci publico pronto.
Pa loke ta trata e tema di e ‘Incinerator’, mi ta afirma cu e cambio di ley di Serlimar nunca tawata tin di haber cu e compra di un Incinerator grandi y ningun autorisacion a wordo otorga na e Minister di Medio Ambiente pa haci tal. E ley aki solamente ta trata di aclarea un tarea di maneho di Serlimar, cu ta inclui e recibimento di desperdicio cu ta destina pa wordo procesa pa un incinerator, si en caso esaki wordo proba cu ta e miho solucion pa Aruba. Dentro di poco bo lo wordo invita pa un encuentro informativo riba e tema aki.
Pa conclui, mi kier indica cu e dump di Parkietenbos ta e ‘Incinerator’ di mas grandi na Aruba. E dump aki ta forma un peliger grandi pa salud di habitantenan di bisindario y pa medio ambiente di Aruba. Nos Gobierno, Gabinete Wever-Croes ta determina pa resolve e problemanan aki pa awo y pa semper, pasobra abo merece miho.
Cu un saludo cordial, mi ta termina,
Atentamente
Evelyn Wever-Croes
Prome Minister di Aruba