E ley nobo di Serlimar ta clarificacion di e ley existente. Esaki ta necesario pa asina por ancra e responsabilidad cu Serlimar tin encuanto bienestar general y pa percura cu tin un punto di salida cla y transparente pa tur otro compania y partner den e sector di recogemento y maneho di sushi.
E ley di Serlimar no ta solamente importante pa e diferente trayectonan cu nos tincu encamina, sino cu e ta esencial! Pa yega na e maneho duradero di desperdicio y pa yega na cera dump Parkietenbos cu ta un problema medio ambiental y un calamidad wardando pa pasa.
Aruba a haya un señal cla y raspa di Pan American Health Organization a traves di un raport publica, indicando cu e situacion NO por sigui asina! Y cu Aruba su ciudadanonan ta na peliger. Ademas esnan cu ta traha na e sitio y cu ta bin den contacto cu e sitio ta mas aun na riesgo pa dañonan cu tin di haber cu salud. Pesey Gobierno, a traves di Ministerio, a tuma e responsabilidad cu ta encera pasonan cu pa algun kisas no ta facil pero sumamente necesario pa percura pa nos maneho di desperdicio cu ta na bienestar di henter Aruba.
Esaki ta e motibo pa cual e adaptacion di e ley existente ta di suma importancia y ta al caso, pa cual e lo tuma luga aworaki cual lo conduci na cierre di dump na Parkietenbos cu ta un peliger ambiental y pa salubridad publico na Aruba.