Siman pasa tabata un siman importante pa Aruba y su relacion den Reino. Despues di e impase cu a surgi a rais di e cambio di ley di Laft den Parlamento, Gobierno a informa Parlamento cu e no por ehecuta e cambionan haci door di Parlamento pasobra Aruba ta core un riesgo grandi e ora. Gobierno ta spera di por conta riba comprension di Parlamento den e caso aki. E paso aki a trece un poco mas trankilidad den e relacion den Reino y Conseho di Minister di Reino a honra e peticion di Gobierno di Aruba pa duna nos mas tempo y espacio. Nos no ta ainda unda cu nos mester ta, pero nos a tuma pasonan grandi y nos ta riba e bon rumbo.
Conseho di Minister siman pasa a tuma e decision cu pronto reunionnan di Conseho di Minister por bay completamente digital. Esaki ta e proyecto di e-Kabinet cu ta parti di e-Government. Esaki ta un adelanto importante riba e tereno di innovacion, cu lo scapa tempo y placa. Asina Gabinete Wever-Croes ta pone e vision di innovacion den practica.
Wever-Croes a reuni cu e grupo di maestronan preocupa, cu a manifesta e siman prome. Simar y Seppa tambe tabata presente. E tabata un bon reunion, den ambiente di respet y al caso caminda maestronan a trece padilanti e diferente puntonan di preocupacion. Premier Wever-Croes a ripiti su respet y aprecio pa maestronan cu ta yuda nos den educacion di nos yiunan y asina forma nos futuro generacion, y a palabra cu lo sigui den dialogo.
Premier Evelyn Wever-Croes hunto cu Minister encarga cu economia a reuni cu e ekipo di Departamento di Asuntonan economico riba e desaroyo economico di nos pais. El a elabora con nos ta bayendo cu e plan strategico nacional pa cumpli cu e metanan global di Nacionnan Uni, e Sustainable Development Goals. Aruba ta experienciando un crecemento economico di 2.4% e aña aki, siendo cu den Latino America economia lo crece cu apenas 0.6%. Nos ta riba e bon caminda pa cu nos desaroyo economico. Esey ta yena nos cu orguyo y ta demostra cu poco poco pero sigur comerciantenan y inversionistanan ta hayando confiansa bek den nos pais.
Siman pasa Premier Wever-Croes a duna un mensahe nacional pa informa comunidad con ta trahando pa logra trece Aruba bek riba e bon rumbo. A splica con a haya nos pais y ki pasonan a tuma pa cambia e rumbo di nos pais. A elabora riba e logronan grandi den apenas un aña y 10 luna. E retonan ta keda grandi y p’esey Premier Wever-Croes a pidi tempo y espacio pa por tuma e miho decisionnan pa nos pais. Cu FE, perseverancia y den union Premier Wever-Croes ta sigur cu nos lo logra.
MinOWD a cuminsa e siman na dependance di Colegio San Nicolas na Centro di Bario Dakota cu un encuentro cu brugklassers cu cada un a caba di risibi un chrome book. E ta e prome grupo cu lo bay full digital. Tur buki lo ta online y nan lo hiba e chrome book cas pa haci huiswerk. E muchanan ta hopi motiva cu e cambio y tambe hopi consciente di e cambio climatico y ta p’esey no por keda uza buki cu ta bay a costo di nos naturalesa.
Den siman MinOWD a firma na Parke Arikok un MOU entre Fundacion Parke Nacional y Ministerio di Educacion, Ciencia y Desaroyo Sostenibel pa desaroya na Hofi Shon Shoco un hardin botanico, cu lo ta e leerwerkplaats pa studiantenan di SPO y lo yuda muchanan di otro scolnan cu conocemento di nos flora y fauna.
MinOWD a tuma cu agrado conocimento di e ultimo rapport di SER, cu ta mustra cu e Plan Educacion Nacional 2030 cu rason ta pidi atencion pa e 21st century skills. Nan mesun encuesta ta mustra cu e sistema actual di Educacion ta duna insuficiente atencion na esaki y cu ta positivo cu e gobierno actual ta trece e cambio aki, cu lo yuda pa cera e gap entre e mercado laboral y nos educacion.
MinOWD a cera e siman na EPI cu entrega di e certificadonan na e cursistanan di AHLEI, cu ta un programa prestigioso di certificacion di alto nivel na trahadonan den sector turistico.
Ministerio di Infrastructura ta sigui encamina e proceso di digitalisacion. Pa e era nobo aki importante ta pa por garantisa e siguridad di documentonan a traves di sistema encrypted y den cloud. Alabes ta percurando cu Bestuurskantoor tambe ta cla pa e cambionan cu tin na caminda y cu henter Gobierno na cierto momento por bay riba e plataforma digital. E meta ta pa entrante prome di december publico cu ta haci uzo di servicionan di entre otro DIP y DOW ya no lo mester haci esaki a traves di carta fisico sino digital.
Cu un sonrisa riba su cara, curason yena di emocion, expectativa y ilusionnan nobo e siman cu a pasa Minister Oduber a anuncia su decision di inicia un etapa nobo den bida. Despues di ta den politica activo pa 22 aña consecutivo dedicando su bida na lucha pa un miho bienestar pa nos pida baranca y nos hendenan el a anuncia cu e ta retira for di politica activo na december di e aña aki. Motibonan pa e retiro ta estrictamente personal entre otro pa pasa mas tempo cu famia.
Aruba cu un solucion responsabel, amical pa medio ambiente y higienico. E siman aki a presenta e incinerator (chikito) nobo cu lo tin e encargo pa atende cu 3 trabou principal cu tabata tuma luga den forma sumamente anti higienico y den aire liber. Cual ta pa atende cu sludge, bestia morto y desperdicio medicinal, ademas e incinerator lo por wordo utilisa tambe pa deshaci di documentonan confidencial. Tur esaki lo tuma luga den un sistema cera y di acuerdo cu normanan internacional medio ambiental, cu sistema pa monitor e gas produci pa e no ta dañino ni pa empleadonan, bisindario of medio ambiente.
Trabounan di asfalt ta continua, e biaha aki DOW a cumpli cu trabounan den e bario di Yara/Savaneta cual ta un bario cu tambe pa hopi tempo ta sufri di stof. Considerando cu e area tin varios caya cu un entrada y un solo salida y ademas tin e compleho deportivo cual ta bastante activo, e molester di stof pa e habitantenan sigur a aumenta. Ademas tabatin cayanan existente pa varios decada cu a wordo salta den plannan anterior, cual e biaha aki si DOW a percura pa cumpli cu ne. Habitantenan a warda un tiki largo, pero sigur a keda sumamente contento cu e trabou cu a tuma luga.
Minister Otmar Oduber a aproba plan Build With Nature. Pa locual ta desaroyo duradero na Aruba, ta importante pa anuncia cu a aproba plan ‘Build with Nature’. Un paso grandi den direccion di creacion di balansa entre desaroyo y preservacion di medio ambiente. E plan nobo aki ta bay den detayenan di locual ta significa construi y tin desaroyo cu teniendo na cuenta naturalesa y a wordo traha pa departamento encarga cu naturalesa y medio ambiente (DNM). Subsecuentemente den un team integral cu tur departamento concerni manera DIP Y DOW, a bin cu un plan final cual ta den balans.
Minister di Cultura a presencia un bunita show dedica na 30 aña di moda di Ronchi de Cuba.
E mandatario a disfruta di e show y a pasa un rato ameno na House of Mosaic pa celebracion di Ronchi su ’30 years of style’.
Censo 2020 ta den pleno preparacion. Expertonan di Departamento di Estadistica (CBS) a haci un presentacion di Censo 2020 na Conseho di Minister. Dianan 3 pa 13 di october CBS lo haci un prueba den cual lo acerca algun hogar pa asina haci un Censo piloto pa sigura cu tur cos ta funciona debidamente y Censo 2020 por ta exitoso. E meta di e Censo ta pa nos por haya informacion di cuanto habitante Aruba tin, cua nacionalidadnan tur ta biba na Aruba y con ta biba na Aruba.
Pa prome biaha e Censo lo wordo haci completamente digital danki na Setar NV cu a yuda cu e tabletnan necesario pa haci e encuesta. Tur informacion lo wordo monitoria y procesa den tempo real. Censo 2020 lo tene cuenta tambe cu tur e metanan di sostenibilidad di Nacionnan Uni cu relata na e persona y su hogar. Ta trata aki di metanan nr 1 te cu 11, menos nr 2. Di e manera aki nos por haya un bista tambe con duradero Aruba ta desaroyando su mes.
Pa Censo 2020 por ta exitoso e participacion di Pueblo ta importante. Minister Ruiz-Maduro ta haci un apelacion na nos comunidad pa coopera na momento cu wordo acerca pa encuestadornan y brinda nan e informacion necesario. E encuesta ta tuma mey ora y lo wordo haci pa encuestadornan debidamente prepara pa e trabou. E cooperacion di nos tur ta importante, pasobra Aruba ta conta riba bo.
Minister Ruiz-Maduro a reuni cu e linguista y traductor sr. Todd Dandaré tocante di su trabounan literario. Pronto sr. Dandaré lo publica un bunita buki di poesia den cuatro idioma riba Maternidad. E buki lo tin ilustracion di e pintor Gustav Noel y tin como modelo e artista Arubiano Zuleika Coffie.
Minister di Cultura a reuni cu representantenan di Cas di Cultura pa asina haya un bista di nan plannan pa renoba y rebiba e tarima importante aki pa Cultura di nos Pais.
Aruba no a haya un KB, Gobierno di Aruba a haya tempo y espacio pa atende tur reto. Diabierna mainta Minister Ruiz -Maduro a atende un Conferencia di Prensa di Gobierno den cual a anuncia cu Conseho di Minister di Reino a trata e tema di supervision financiero di Aruba y cu Aruba no a haya un KB. Gobierno a haya tempo y espacio pa atende e retonan financiero manera a pidi. Conseho di Minister di Reino a reconoce cu Aruba ta tumando pasonan importante financieramente y cu Pais Aruba ta riba e bon caminda. Cu e solucion cu Gobierno di Aruba a presenta ta tene cuenta cu preocupacion di ambos banda, Parlamento di Aruba y Conseho di Minister di Reino. Esaki ta trece trankilidad pa duna Aruba e tempo y espacio pa atende cu e retonan financiero di nos pais, tempo y espacio pa cumpli cu e protocol y tempo y espacio pa bin cu nos organo di supervision independiente.
E siman aki a lansa oficialmente e fact team. E team aki lo duna servicio ambulatorio na muchanan y hobennan cu problema cu comportacion, adiccion y problema mental. E oficinanan ta situa na Santa Cruz y Playa.
Minister Dangui Oduber a atende cu e problema serio cu tin na hospital. A haci un ‘site visit’ pa mira e daño cu a wordo ocasiona pa yobida. Ta lamentabel cu nos tin cu bay paga pa un proyecto di gobierno di AVP cu no ta uno di calidad. A manda un carta fuerte pa Soga pa informa cu Gobierno ta evaluando si lo bay cumpli cu su obligacionnan di pago mirando e calidad di e proyecto.
Minister di Husticia Andin Bikker a tene reunionnan di trabow hopi fructifero na Washington DC, acompaña pa Minister Plenipotenciario Joselin Croes, Korpschef Andrew Hoo y consehero Milko Baiz, referente temanan pa amplia cooperacion riba tereno di Husticia, manera Cybersecurity, retonan di cryptocurrency, sistema pa monitoria reclusonan (inmate tracking system), combatimento di trafico ilicito, optimalisacion di siguridad di frontera, y actualisacion di leynan a base di sistema comparativo (rechtsvergelijking).
Tambe a reuni na Embahada di Reino cu representantenan di varios instituto Mericano, conhuntamente cu representantenan di departamentonan di Aruba, den cuadro di entre otro e proyecto Happy Flow, pa por wak con por optimalisa e procesonan via avanse technologico cu ta wordo aplica na Merca y na Aruba, pa e turista por ta mas lihe na su hotel pa disfruta di su vakantie y estadia.