Kustwacht conhuntamente cu Polis, Arumil y Douane, a cuminsa cu accion riba lama, den cual a caba cu detencion di 10 homber tur di nacionalidad Venezolano, despues di a haya nan ta trata di drenta nos isla ilegalmente cu un cargacion di droga y arma.
Oranjestad: Diamars anochi algo prome cu mey anochi, Kustwacht conhuntamente cu Polis, Arumil y Douane, a inicia cu un accion riba lama, esaki a caba exitosamente te den oranan di Diamars marduga. E accion a cuminsa na momento cu Kustwacht a nota un boto saliendo for di Venezuela, mesora a alerta tur instancia concerni.
Kustwacht a saca e Metal Shark a mande direccion e boto. E boto tabata na cabes di Aruba na momento cu ela wordo sopresa pa e Metal Shark di Kustwacht, e tripulante abordo di e boto no a haya chens di reacciona. E team abordo di Metal Shark cu arma den man a logra controla tur 10 persona abordo, nan no a resisti.
E boto a keda confisca y a wordo treci na e pier di Kustwacht na Savaneta, tur 10 persona tabata di nacionalidad Venezolano, nan tabata kier a drenta Aruba na un forma ilegal. Despues di un investigacion chikito autoridad a logra saca afo ken ta e capitan di e boto. Durante cu autoridad tabata haciendo investigacion riba e boto caminda autoridad a logra haya dos arma di candela, pistol cu un cantidad di bala, tambe durante cu nan tabata ristando nan a bin topa cu cuater bulto di droga. Cada un di e bultonan aki tabata contene mas o menos 10 paki di droga. Un total di 40 paki tambe a keda confisca.
Despues cu personal di Kustwacht, polis, Arumil y Douane tabata tin tur cos bou control, recherche di departamento di droga a tuma over. E capitan di e boto lo mester bay duna cuenta na autoridad di e cantidad di droga, arma y e 10 personanan ilegal haya abordo.