Dialuna anochi 23 di september ta inicio di e encuentronan den publico organisa pa DIP, den cuadro di Ruimtelijk Ontwikkelingsplan Aruba met Voorschriften (ROPV). ROPV ta un proyecto di ley cu ta sali for di e Landsverordening Ruimtelijke Ontwikkeling (LRO), cual ya caba for di 2006/2007 a wordo aproba. ROPV ta encera condicionnan mas detaya pa e reglanan cu tin den ROP.
Minister di Desaroyo Teritorial, Infrastructura y Medio Ambiente Otmar Odubera, durante rueda di prensa semanal di Gobierno a splica locual cu esaki ta encera.
E proceso ta describi pa ley kico tur tincu tuma luga, pesey den e fase cu ta actualmente ta hopi importante pa medionan di comunicacion transmiti e informacion pa comunidad. Lo tin tres anochi di encuentro cu publico, cu presentacion di cuater grupo di trabou cu a wordo instala mediante decretonan ministerial. Caminda cu ta haya un bista completo riba posicionamento di pais Aruba su desaroyo teritorial, confrome reglanan cu tin den ROP.
Minister Otmar Oduber a sigui splica cu e tres anochinan lo tuma luga e siman aki (23, 24 y 25 di September). Despues, pa prome di October, e documento lo ta ‘ter inzage’ na DIP. Pues tur esnan interesa, ta haya e oportunidad durante un luna pa por bishita DIP pa por haya tira un bista den e ROPV aki. Importante den e ROPV ta, cu ta bay den hopi mas detaye den e reglanan fiha den ROP, pero sigur tambe e caracter di tin un programa piloto den e ROPV pa loke ta trata inrichting di San Nicolas. ‘A scohe un districto specifico, pa motibo cu nos sa cu dentro di poco nos ta bay tin un desaroyo hotelero na San Nicolas, pa cual kier percura cu a traves di e ROPV aki, ta prepara e inrichting di San Nicolas, pa evita di haci erornan haci den pasado, cu decisionnan cu nos por haci miho awe. Entre otro cuida e caracter di San Nicolas y mantene e vision pa e ta e ciudad di herencia y cultura’, Minister Oduber a splica.
Despues di e luna di inzage cu ta termina prome di November, cada persona lo tin oportunidad durante un luna atrobe pa entrega tur pensamento/ opinion (zienswijze) riba e contenido di e ROPV.
Mester bisa cu pareu cu e documento wordo poni ter inzage na DIP prome di October, e ta bay tambe pa e Raad voor de Ruimtelijke Ontwikkeling (RRO). Cu ta haya nan espacio pa por duna nan conseho necesario na Gobierno. Unabes cu e fase di zienswijze termina, ta permiti esnan cu a entrega zienswijze, pa por trata esaki personalmente a traves di un presentacion na DIP. Dunando e persona mas espacio/oportunidad pa bay den detaye riba e cambionan tumando luga. Despues di e procesonan aki, Gobierno pa ley tin seis luna pa e por wordo introduci oficialmente. Minister Oduber a bisa cu di acuerdo cu planificacion, ta spera cu na final di April, e ROPV lo por drenta na vigor.
Pa conclui, mester remarca cu esaki ta un momento sumamente importante, pasobra a pone hopi atencion na e aspecto di cuido di nos naturalesa y medio ambiente cual ta significa cu lo planifica mas miho, unda, kico y con ta bay construi. Cu enfais pa percura cu e desaroyo ta tuma luga cu bista y proteccion di cuido di nos flora y fauna, mas caminda cu ta posibel.