Paradera – Diabierna merdia pa mas o menos 12:30 p.m informacion a drenta di un accidente serioa na crusada di Citgo Paradera.
Mesora polis y tambe polis di trafico a dirigi nan mes pa e sitio.
Na yegada nan a topa cu un Nissan Tiida y un Kia Sportage, ambos cu basta daño material.
Loke a sosode
Na e sitio nos a compronde cu e Nissan Tiida bayendo direccion Piedra Plat, tawata core cu e señal di luz banda drechi sendi.
Esaki a pone cu e dama na stuur di e Kia Sportage a pensa cu e Nissan lo ta bay bira.
Lamentablemente esaki no a sosode, door cu Nissan a sigui strit y door di esaki ta dal contra porta di e Kia Sportage.
Den e Kia Sportage tawata tin tres persona, dos adulto y un mucha muhe di 4 aña. Debi na e impacto, e mucha lo a bay dal su cabes basta duro y tawata yora.
Chauffeur di e Sportage tambe a ricibi golpi, pero no di gravedad.
Mester remarca cu Ambulance a tarde basta, debi cu exactamente e momento eynan otro cosnan a pasa unda tawata tin mester di ambulance.
Na yegada di e Ambulance su Paramediconan mesora a baha y cuminsa busca informacion di esnan cu tawata tin mester di asistencia.
Na final a opta pa hiba e criatura Hospital pa un control medico mas riguroso.