Fin di augustus a tuma luga e graduacion di un grupo di studiantenan di EPI cu a caba nan BBL y tambe un colega empleado cu a sigui specialisa su mes riba tereno di Higiena y Prevencion di Infeccion. Un atardi ameno unda cada studiante a ricibi nan ‘diploma’ y a comparti momentonan ameno cu otro.
Frans Figaroa, interim manager di HOH Academy, a duna di conoce cu a hinca esaki den un estilo di ‘vakschool’. Esaki ta nifica cu e alumnonan ta cuminsa na EPI e prome 2 añanan. Ora cu studiantenan yega nan di tres aña den BOL (Beroeps Opleidende Leerweg) ta selecta algun pa traha na hospital. HOH Academy a palabra cu EPI cu e studiantenan ta bay 1 bes pa siman scol pa haya e parti teoretico, mientras cu e resto di tempo nan ta keda labora den Hospital pa asina ricibi formacion practico siñando a base diario con pa duna cierto cuido.
Na aña 2017 Dr. Horacio E. Oduber Hospital hunto cu EPI a cuminsa cu e proyecto pa bin cu un Beroeps Begeleidende Leerweg (BBL) cual ta un sistema di guia nos mesun hendenan den Hospital. A firma un acuerdo di colaboracion pa 5 aña unda cu HOH Academy tin coleganan dedica na comunica regularmente cu EPI y e studiantenan.
Tur aña lo selecta minimo 10 studiante di EPI; ta haci un entrevista di solicitud y tambe un test psicologico pa despues nan por drenta den servicio di hospital. Nan mester haci un ‘stage’ di 4 luna den tur departamento pa asina gana experencia den tur loke ta pasa den hospital. Pa esaki nan ta firma un asina yama leerarbeidsovereenkomst cu Hospital cual ta encera cu despues di nan estudio nan tin un trabou sigura na Hospital.
Asina aki ta duna oportunidad grandi pa nos mes Arubianonan por sigui specialisa nan mes despues di e estudio aki por ehempel pa cuido intensivo, pa enfermera na departamento di emergencia, na Clinica di Dialyse of otro specialisacion cu HOH Academy por ofrece.
Emmanuel Cepeda, un di e graduadonan cu ta labora awo como verpleegkundige na departamento Niet Snijdend 4 a duna di conoce cu e trayecto aki a bin na un bon momento di su bida. E tabata buscando un forma pa por termina cu su estudio. E tabata falta e orarionan di practica, pasobra e ta un persona door di haci un trabou e ta siña mas di dje. E practica aki tabata e oportunidad perfecto y asina e por a logra su meta di bira un verpleegkundige.
Durante e celebracion aki di e graduadonan di EPI, tabatin tambe un graduado di departamento di ‘Hygiene en Infectiepreventie’. Sra. Marjolyn Maduro tabata labora como verpleegkundige caba pero a bay specialisa su mes riba tereno di higiena y prevencion di infeccion. Ela termina cu exito e curso “Infection Control Practicioner” y a haci esaki via un programa “online” hunto cu e institucion EPAC na Canada.
Pabien na tur graduadonan y exito cu nan futuro carera den cuido medico!