AHATA: Mas gasto ta hasi Aruba mas caro pa turista y residentenan

ORANJESTAD, Aruba: Gobierno y Departamento di Impuesto a invita representantenan di sector priva pa repasa reforma di impuesto cu e task force di gobierno ta propone na e momento aki. A duna oportunidad na gremionan cu ta representa sector priva, incluyendo AHATA, pa duna comentario na e propuesta pa di dos fase di reforma fiscal cu lo drenta na vigor 1 di Januari 2020. Aunke tin comprencion pa e hecho cu Aruba ta den un situacion financiero cu ta rekeri decision dificil pa nos pais, AHATA ta expresa preocupacion pa algun hecho:
Ta importante pa mira un plan integral en bes di varios impuesto un pa un, pa tin bista riba e efecto total cu lo tin riba nos comunidad.
Tur impuesto nobo pa 1 di Januari den e propuesta ta afecta e industria di turismo directamente cu aumento grandi den costonan sin ofrece ningun alivio.
Ya tin percepcion serca turista cu Aruba ta caro, segun encuestanan. Kiermen nos ta pone nos pilar economico principal na peliger cu costo adicional di negoshi. Nos no mester morde e man cu ta duna nos di come.
Cu costonan di negoshi mas halto lo tin menos inversion den producto, menos oportunidad pa empleo, y menos donacion directo na proyectonan cu ta beneficia comunidad.
Durante e reunionnan, Aruba Hotel & Tourism Association a pidi gobierno tambe pa:
Duna un mihor bista riba e gastonan cu gobierno ta bahando. Ora AHATA a menciona cu mester yega na presupuesto di 2020 por medio di corta gasto y no solamente hisa entrada, a sigura nos cu gobierno ta trahando riba reduccion di gasto tambe. AHATA a sugeri pa duna sector priva y comunidad un claridad tocante tal reduccionnan di gasto.
Pa ricibi mas contexto, por ehempel claridad riba cuanto entrada pa gobierno cada impuesto nobo lo genera.
Ademas a enfatisa cu ta importante pa sector priva, cu ta pone economia lora, tin participacion real den e proceso y duna suficiente tempo pa analisa e sugerencianan y duna reaccion pa solucionnan cu por beneficia sector priva, gobierno, y consumidor.
Durante reunion di diaranzon, gobierno a menciona cu ta intencion pa reforma tur e tarifanan cu turista ta paga den fase 4, den 2021. Esey tambe ta e plan di fase cu a wordo menciona na fin di 2018. Sinembargo, despues di a mira e 3 impuestonan nobo di reforma fiscal fase 2, AHATA a ricibi noticia cu un ley a yega Parlamento pa hisa tarifa cu turista ta paga pa cubri gastonan di Serlimar.
Sin un bista riba un plan completo, nos por unicamente mira cu tin un cantidad di impuesto nobo cu ta causa cu nos producto turistico ta bira hopi mas caro. Mientras cu tabatin hopi aumento di gasto caba den ultimo 6 aña (tabel adhunto). Turismo ta nos pilar economico y tin competencia grandi den Caribe. Ta importante pa nos tene cuidao pa mantene un industria sostenibel pa interes general di Aruba. AHATA a aprecia e declaracion di Parlamentario Sr. Endy Croes recientemente cu turismo ta vulnerabel y nos mester cuida loke nos tin.
Mientras cu mester tin comprension pa e retonan di gobierno, mester tin comprension pa e retonan di e companianan cu ta brinda servicio na nos bishitantenan, y e necesidad di proteha tur e tata y mamanan local cu ta emplea den e sector di turismo.