ORANJESTAD – Den e conferencia di prensa di Gobierno, Minister di Finansa a brinda informacion toy splicacion riba e reaccion di e organo di supervision CAFT riba e cifranan di e di dos kwartaal di ehecucion di Presupuesto 2019.
Evaluacion positivo di CAFT
CAFT su evaluacion ta positivo, Gobierno ta realisando e entradanan premira y ta conteniendo su gastonan kedando den e cuadro financiero. CAFT den su reaccion ta pidi Gobierno atencion pa algun asunto cu ta forma un risico.
Gastonan di AZV
CAFT ta conseha Gobierno pa vigila e gastonan di AZV ya cu esakinan ta subiendo den e ultimo añanan. E mandatario a informa cu Gobierno tin atencion pa esaki y ta bay haci un investigacion riba e gastonan di AZV.
Reforma Fiscal
Riba e entradanan di e Reforma Fiscal, CAFT ta remarca cu Gobierno mester compensa e entrada di ‘sugartax’ ya cu esaki no a wordo introduci den e dos mitar di aña manera planea. Minister di Finansa a splica cu Gobierno ta trahando duro pa bini un solucion pa cu esaki.
Gastonan di Personal
CAFT ta di opinion cu Aruba no ta cumpli cu e norma di gastonan di personal door cu no a inclui e gastonan di personal di Social Crisis Plan (SCP) den e gastonan y personal di 479 miyon riba e presupuesto. E mandatario a splica cu Gobierno di Aruba tin un diferencia di opinion cu CAFT tocante di esaki y actualmente Pais Aruba y Hulanda ta den deliberacion con pa soluciona esaki.
Minister Xiomara Ruiz-Maduro ta di opinion cu Pais Aruba a ricibi un bon evaluacion di CAFT riba e cifranan di e prome mitar di aña 2019. E ta un bon rapport den cual ta refleha locual e mandatario a splica den e Reunion Publico den Parlamento algun siman pasa. E documento di CAFT ta uno positivo y ta disponibel riba http://www.cft.cw/jdownloads/All%20downloads/Adviezen/Aruba/cft_201900115_reactie_op_de_tweede_uitvoeringsrapportage_2019_aruba.pdf
