Durante di e encuentro exitoso di partido AVP diadomingo merdia, esta ‘Encuentro Voluntarionan 2019 – Un Causa Comun,’ miembro di partido AVP y di fraccion di Parlamento, Sr. Richard Arends, a referi na e atakenan personal riba dje buscando un forma pa sconde e realidad duro di e situacion financiero di e pais y e impase cu Hulanda pa pueblo di Aruba.
“Hopi biaha hobenan y profesionalnan cu ta asercami pa afilia nan mes na nos partido AVP, pa yuda den e diferente organisacionnan di nos partido, kendenan tin soñonan, metanan y ambicionnan grandi pa nos Pais, mescos cu’mi persona mas cu 12 aña pasa. Mi ta bisa nan cu politica ta un instrumento pa logra metanan sumamente bunita si e wordo usa corectamente y a base di nos principionan, nos a logra hopi durante nos ultimo Gobernacion.Awe tambe den Parlamento nos ta hiba e mesun liña consistente aki.
E ultimo simanan aki mi tabata blanco di un politica baho basa riba mentira, pero mi a scohe pa keda na nivel. Manera mi colega Robert Candelaria semper ta bisa: ‘mi ta invita mi oponentenan join mi na e nivel halto cual politica cu ta na bienestar di nos Pais mester ta.
E metanan pa cual nos ta drenta pa sirbi e causa comun sea ta hopi ambisioso, idealista, of simplemente pa mehora e calida di bida di un persona of famia, semper ta cuminsa cu un prome stap. Un yamada, un oido y atencion. Parlamentario Richard Arends a ilustra esaki cu varios ehempel unda cu e la splika cu e admiracion pa nos naturalesa ta comienso pa cuida nos medio ambiente , nos lama y e bida maritimo pa asina conserva nan pa futuro generacionnan.
Nos cu ta para akinan y tabata tin e dicha di a cumpli cu un ambicion of meta grandi, sa cu esaki no a bay sin mas. Nos ta pasa den contratiempo, nos ta pasa den friccion y den dolornan di cabes, pero esaki a haci nos fuerte y determina pa logra nos soño, sea si esaki ta un estudio, scirbi un buki, haya un trabou, ta excelente den deporte, of bira un artista famoso. Partido AVP ta inculca esaki den nos hobennan, sea cu nan ta forma parti di ekipo di boluntarionan, activistanan of ta den e diferente organisacionan di nos partido.Desde su nacemento partido AVP a haci esaki, e prome partido cu a cuminsa cu un ala hubenil (HAC), cu institutonan manera Fundacion Digna Lacle-Herrera pa formacion politico y Fundacion FESCA cu awor ta Fundacion Mito Croes pa estudionan cientifico y awor cu PHP cu ta maneha Tienda di Ley,”
Y pakico AVP?, e contesta ta simpel: Pasobra e ta un partido inspirativo, un partido cu ta yuda hobennan logra nan soñonan, un partido basa riba e principionan social-cristian cu ta e fundeshi di nos sociedad. Formando parti di un partido cu mi ta kere den su principionan fundamental, un vision cu mi ta sinti mi mes parti di dje y cu un e sentido di responsabilidad grandi nos ta sigui inspira y motiva nos miembronan, sostenedornan, activistanan y voluntarionan.
A pesar di tur contratiemponan: ban sigui ta e ehempel pa otronan, pa tur cu ta biba riba e isla chikito y bunita aki; ban sigui inspira otro cu nos ideanan inovativo y asina logra un miho Aruba y un miho mayan,” Richard Arends a informa tur presenta.