Minister Schouten y Gezaghebber Rijna lo efectua apertura di oficina nobo di DCNA

Kralendijk, Boneiro – Minister Carola Schouten, encarga cu Agricultura, Naturalesa y Calidad di Alimento na Hulanda, lo haci apertura di e oficina nobo di Dutch Caribbean Nature Alliance (DCNA), hunto cu Gezaghebber Edison Rijna. Esaki lo tuma luga durante su bishita di trabou na Boneiro. DCNA ta sumamente honra cu e bishita special aki y lo haci uzo di e oportunidad pa boga pa participacion di tur seis isla cu ta forma parti di Reino Hulandes, na proyectonan y plannan pa maneho di naturalesa den Caribe Hulandes.
Yamada urgente pa apoyo na tur e islanan E islanan cu ta pertenece na Reino Hulandes conose diferente habitat, manera rif di coral, mondi di palu di mangel, cierto tipo di vegetacion bao di awa, neblina tropical, selva tropical y cueba cu un grado sumamente halto di biodiversidad (cantidad di sorto di mata y bestia). E habitatnan aki ta bao di presion enorme. Presion causa pa hende, cu ta manifesta su mes den un ecosistema fragil y cu hopi especie den peligro di extincion. E organisacionnan pa maneho di naturalesa tin mester di mas sosten di gobiernonan local y di Hulanda, mescos cu sosten di Europa, pa por protehe e naturalesa unico di nos region. E sosten aki tin un grado di urgencia halto.
“E retonan nos dilanti ta enorme. Y e retonan aki no ta exclusivo pa Boneiro, Saba y Sint Eustatius, cu for di 2010 a bira municipionan special di Hulanda. Nos islanan ruman Aruba, Corsou y Sint Maarten tambe ta enfrenta e mesun retonan aki, mescos cu sobra di Caribe”, presidente di directiva di DCNA, señora Hellen van der Wal, ta splica.
“Si toch e problemanan ta parecido na otro y ta conecta un cu otro, dikon nos lo no traha hunto na e solucionnan e or’ei? Na final di dia, nos ta un solo Reino! E ta parse un conclusion sumamente logico, pero lamentablemente den practica cosnan ta mas complica, pa motibo cu Antia Hulandes a disolve. Nos ta mira con, tanto fondo como proyecto, ta bai destina pa islanan BES. Nos ta boga pa e tres islanan autonomo den Reino no keda exclui, pero mas bien pa inclui nan den tur proyecto pa proteccion di naturalesa. Si ta necesario, pa medio di fondo propio di nan mes of pa medio di financiamento alternativo. Gustosamente DCNA ke intermedia den esaki”.
Dutch Caribbean Nature Alliance Dutch Caribbean Nature Alliance (DCNA) ta un NGO forma pa e organisacionnan encarga cu maneho di areanan protehe di naturalesa na Aruba, Boneiro, Corsou, Saba, Sint Eustatius y Sint Maarten. A lanta DCNA pa protehe naturalesa y stimula su maneho duradero na e seis islanan aki. Dor di traha hunto y comparti abilidad, conocemento y material, DCNA ta logra mantene un bon ret di contacto y sostene maneho di naturalesa den henter Caribe Hulandes. DCNA ta yuda ofrese e parkenan fuentenan duradero di financiamento tambe. E colaboracion entre e seis islanan den Caribe Hulandes, pa medio di DCNA, ta unico den nos Reino y segun señora Hellen van der Wall, hopi organisacion por uza esaki como un ehemplo.
Apertura di oficina nobo DCNA ta honra cu e echo cu Minister Schouten y Gezaghebber Rijna ta mira e importancia di colaboracion regional y cu nan ta disponibel pa efectua apertura di e oficina nobo di DCNA dia 5 di september awor. Riba e dia aki por cera conoci tambe cu DCNA su director nobo, señor Tadzio Bervoets.
Secretariado di DCNA ta situa na Boneiro y recientemente nan a muda pa e localidad nobo na Kaya Nikiboko Zuid 56.