Cumpra bo carchi di entrada of haci bo donacion
The Aruba Black Tie Foundation desde aña 2014 ta organisa “Black Tie Dinner & Ball” pa recauda fondo pa un instancia na Aruba. E aña aki, Scol Basico Dornasol a haya e oportunidad pa ricibi e donacion aki pa asina por yega na un bus special pa transporta su alumnonan entre otro pa e diferente actividadnan cu e scol ta organisa durante aña.
Scol Basico Dornasol (SBD). Scol Basico Dornasol ta un cluster 4 school (e unico na Aruba) cu a habri su portanan dia 4 di september 2017. Aki ta duna muchanan cu tin mester di enseñansa special nan oportunidad. Ta duna guia na muchanan cu tin un of otro problema psikiatrico manera ADHD, autismo y hopi mas. Tambe problema cu conducta severo y problema social emocional ta haña su atencion.
Alumno cu drenta SBD ta alumno cu un inteligencia promedio te cu inteligencia halto. Actualmente SBD tin 23 alumno y ta consisti di Kleuterklas te cu 5de klas y pa aña 2020-2021 ta habri klas 6. Klasnan na SBD no por consisti di mas cu 8 alumno. Asina Scol Basico Dornasol ta bira un scol basico completo.
Meta di Scol Basico Dornasol ta pa recauda fondo pa asina por yega na un mini bus pa por transporta e muchanan. Ta dificil pa haña transporte pa hiba e muchanan na actividadnan pafo di scol, teniendo cuenta cu e situacion ariba menciona. Pa e motibo aki Aruba Black Tie Foundation ta sostene Scol Basico Dornasol den e meta aki organisando “Black Tie Dinner & Ball”.
“Black Tie Dinner & Ball” ta tuma luga diasabra 7 di september 2019 na Renaissance Convention Center di 7:00 pm pa 3:00 am. Entrada ta FLS.175,- pa persona. E ta inclui Gala Dinner Buffet y un fiesta bailabel cu 3 banda y un DJ. Banda invita e aña aki ta Badu y su Orkesta cu lo brinda animacion formando linea cu Robert Jeandor y su Solo Banda Show, D’licious y DJ Randy cu Metropolis.
The Aruba Black Tie Foundation ta pidi bo cooperacion pa yuda nos esfuerso contribuyendo den un di e siguiente maneranan:
- Cumpra carchi na balor di AFL.175,- pa persona (cu lo bay na donacion)
- Donacion efectivo (pa cubri gastonan di entre otro banda y bebida)
- Premionan (pa rifa como doorprizes durante e evento)
Pa mas informacion por tuma contact cu sra. Rosy Abreu-Vasco na: 592-6435, y sra. Sharine Geerman na: 593-4249.
“Aruba, ban yuda The Aruba Black Tie Foundation yuda Scol Basico Dornasol yega na nos mini bus. Nos muchanan lo keda contento. Muchanan di nos scol ta contento di sa cu pronto nan por haya un bus pa asina transporta nan pa diferente evento. Coorperando cu “Black Tie Dinner & Ball”, bo ta duna bo mes e oportunidad pa haci nos muchanan feliz, y ora bo wak e bus cu e Colebri y Dornasol skirbi riba dje, bo lo sinti e satisfaccion y alegria cu bo tambe a contribui na un proyecto asina bunita”, Directora di Scol Basico Dornasol Rosy Abreu-Vasco a expresa.