Diamars 27 augustus 2019, Minister dr. Armando Rudy Lampe a haci un bishita na Scol Basico Dornasol riba nan prome dia di scol na nan localidad nobo y mas espacioso na Burubundo. Minister Lampe a expresa cu el a nota e ambiente hopi positivo cu tawata reinando tanto den e docentenan pero tambe den e alumnonan.
Scol Basico Dornasol a wordo amplia y awor ta conta cu un kleuterklas y por sigui te cu di 5de klas di scol basico. Pa otro aña esaki lo wordo amplia cu klas 6 tambe y e scol lo tin enseñansa basico completo.
E cabesante di Scol Basico Dornasol Juffrouw Rosy y su staff a keda masha contento cu e localidad nobo. Nan a keda agradeci pa cu e bishita di Minister Lampe, cu a duna sosten na e “studiantenan kluster 4” cu hopi biaha no tin’e facil, den nan estudio. Na final Minister Lampe a desea nan tur clase di exito y a encurasha nan, pa nan sigui cu e bon trabow.