Minister Plenipotencario na Washington mr. Joselin Croes durante su bishita cortico na Aruba, a dedica tempo na algun topico sumamente importanta pa Aruba entre otro; combatimento di polucion; energia alternativa; proteccion di nos laman y medio ambiente; construccion sustenibel y prevencion contra desasternan natural. ‘Blue Economy’ ta un topico hopi importante pa Aruba. Esaki ta e economia sustenibel cu ta sali for di bo laman cu ta piscamento, turismo, energia alternativo man den man cu proteccion di e laman, coral y bida marino.
Riba e topiconan aki Minister Plenipotencario Croes a reuni cu e ekipo di Minister di Infrastructura y Medio Ambiente, Santa Rosa, TNO y Directie Natuur en Milieu pa scucha kico nan ta haciendo riba e terenonan aki paa mira unda e por crea oportunidadnan pa Aruba.
Ministerio di Infrastructura y Medio Ambiente
E ekipo di Minister di Infrastructura y Medio Ambiente a duna Minister Plenipotencario Croes un presentacion riba e proyectonan andando pa Aruba na unda por pidi yudansa, colaboracion y of financiamento na Merca. E proyectonan mas grandi ta e ceramento di e dump na Parkietenbos, traha un landfill nobo cu un incinerator y bin cu un waste to energy facility. Tambe e ekipo a presenta e ROPV nobo, cu lo trece cu n’e transpariencia riba cual ta e terenonan protehi y unda si y no por construi, tambe ta inclui e “build with nature policy” cu ta proteha nos recursonan natural.
Na Minister Plenipotencario Croes nan a pidi ayudo pa cu experticio pa cu proteccion y restauracion di e coralnan, ya cu na Merca tin hopi organisacion trahando riba e ramo aki. Tambe Minister Plenipotencario Croes a duna un splicacion amplio riba “Blue Economy” y fondonan disponibel pa esaki. Aki a keda palabra cu Minister Oduber lo biaha pa Washington DC na october pa e IMF/WB Annual Meeting pa asina haci un peticion oficial na Worldbank pa un “Blue Bond” of un “Debt Conversion” manera Seychelles a caba di haya.
Tambe a papia pa sondea e mercado internacional pa un otro material sustenibel cu no ta asphalt pa traha caminda. Minister Plenipotencario Croes a splica e ekipo cu Worldbank a traha un raport yama “Marine Pollution in the Caribbean: not a minute to waste”. Den e raport aki nan ta indica cu si mundo sigui den mesun rumbo, cu pa 2050 tin mas plastic den lama cu pisca y cu vooral e islanan den Caribe cu ta biba di lama y nan recursonan natural ta limita lo wordo afecta.
Aruba por ta orguyoso cu su plan di prohibicion di plastic. E raport aki ta inclui un plan cu ta consisti di 12 punto di locual Aruba ya ta cumpli cu 7 di nan. Pa esaki Minister Plenipotencario Croes a felicita e ekipo, pasoba Aruba ta hopi mas leu cu tur otro isla. Worldbank kier yuda Aruba yega na cumplimento di tur 12 punto, basta Aruba presenta un plan factibel y realisabel. E ekipo di Minister di Infrastructura lo traha un raport basa riba e 12 puntonan aki pa entrega na Worldbank pa yuda cu financiamento di e resto di accionnan cu falta.