Gobierno a tuma e decision cu mas y mas kier bay den direccion pa digitalisa e procesonan dentro di Gobierno. Den cuadro di esaki Minister Otmar Oduber a reuni cu e diferente departamento cu ta resorta bou di Ministerio di Desaroyo Teritorial, Infrastructura y Medio Ambiente. A mira con e procesonan aki ta tuma luga na Paisnan adelanta den esaki, pa cual a tuma e decision cu gran ambicion pa inicia cu e proceso di digitalisacion di Ministerio, particularmente pa atende cu e proceso di maneho di documentonan di Gobierno.
Meta October 2019
Ministerio tin como meta pa entrante prome di October 2019, ta completamente riba un plataforma digital “integrated digital platform”. Esaki ta significa cu papelnan / documentonan cu ta bay pa Minister pa conseho y decisionnan, cu hopi biaha ta encera un cantidad di documento ta bay tuma luga a traves di sistema digital.
E motibo primordial cu ta haciendo e cambio aki ta pa eficiencia. Pa añanan e aparato gubernamental/ sector publico a keda atras den e aspecto aki di digitalisacion, creando ineficiencia den e trabounan. Cu e cambio aki productividad definitivamente lo bay aumenta. Pa loke ta control, aworaki esaki ta dificil pasobra tin cantidad di proyectonan andando simultaneamente. Pa cual ta facil pa perde bista di e procesonan y ta dificil pa haya sa unda un proceso tranka por ehempel. Mientras cu a traves di e sistema digital, lo por mira e proceso di un documento y haya sa na unda e ta y dicon e ta tardando. Actualmente e proceso di documentonan cu yega Ministerio ta tarda bastante y ta encera varios transportacion a traves di bode, pa esaki yega na BID y departamentonan cu mester registra esaki.
Sistema sigur y den ‘cloud’
Cu e sistema digital ta elimina tur e tempo di transportacion aki cu por encera lunanan, cu ningun hende ta trahando riba e documento. Pasobra a traves di e sistema di ‘cloud’ unabes cu ‘upload’ e documento, esaki lo sincronisa riba e plataforma y automaticamente tur departamento concerni lo tin esaki. E sistema lo ta atraves di un sistema ‘safe’ cu su ‘backup’, pa cual comunidad por tin confiansa den dje.
Pa conclui, importante pa remarca cu e proceso lo conta un un fase transitorio caminda cu lo bay tin algun documento cu no lo tuma luga completamente digital na inicio. Ademas e meta ta tambe pa December, comunidad tambe por uza e sistema y ‘upload’ peticionnan online. Pero pa October e procesonan interno entre departamentonan lo tuma luga digital.