Despues cu e secreto publico di actual parlamentario Arends (fraccion AVP) a bira conoci, cu e tin un contracto firma cu RDA cu lo costa Pais Aruba 2.6 Miyon florin, awa a pasa hariña pa esnan cu tawata sostene e partido cu un tempo tawata grandi.
Ta asina cu den tratamento di e ‘uitvoerings rapportage 2e kwartaal’ den parlamento a sali na cla cu Arends hunto cu ayudo di e tempo ey minister De Meza, a regla pa su mes un contracto miyonario cu refineria di Aruba. Algo cu moralmente ta contra di tur etica di bon gobernacion, como cu e momento cu a firma e contracto e gobierno di AVP tawata demisionario, y riba dje, Arends a nenga di haci conoci den su entrada y huramentacion na parlamento di Aruba cu e tawata tin e areglo aki firma cu RDA.
Transparencia
Ta normal cu cada persona cu ta yega na ocupa e funcion di parlamentario ta haci conoci cual ta e acuerdo cu e tin cu su previo dunador di trabou. Y den e caso specifico aki, Arends ningun caminda den su ‘geloofsbrief’ ta indica esaki. E motibo no ta conoci ainda pakico el a scoge pa tuma e postura aki, y den e proximo reunion publico, e lo tin di trece claridad ariba e caso aki.
Aruba tin necesidad di politiconan transparente y cu ta sincero cu pueblo y e ta un desapunto pa mira cu un hoben manera Arends a bay contrario di e standardnan aki.
Debacle
Esaki ta caba di mustra ariba e echo, cu si Arends – e potencial futuro lider di partido AVP – ta atende cu pueblo di e manera aki, ta un muestra real cu AVP ta den un debacle serio. E ta mustra ariba e echo cu Eman tawata na altura di tur esaki y a permiti’e tuma lugar of ta duna espacio pa pensa cu a conspira pa caba cu e carera di e hoben politico aki, mescos tawata e caso di Yrausquin, Croes y awor Arends. Tempo lo mustra.
Di tur manera, ta un realidad awor cu Eman y partido AVP ta den un debacle serio.