“San Nicolas tin tera fertil pa diversificacion di nos economia caminda tin oportunidad pa turismo, economia creativo y logistica”
Oranjestad – Diaranzon mainta e mandatario a presencia e promer Cumbre di Negoshi na San Nicolas organisa pa San Nicolas Business Association (SNBA) den cual e ‘decisionmakers’ di nos Pais a topa cu comerciantenan interesa pa inverti den San Nicolas y vecindario.
Durante e cumbre e mandatarionan y e comerciantenan a haya oportunidad pa presenta nan vision y proyectonan pa San Nicolas y vecindario. Como Minister encarga cu economia, Sra. mr. Xiomara Ruiz-Maduro tambe a hiba palabra y a elabora riba e tera fertil cu tin pa diversificacion di nos economia, den cual San Nicolas ta brinda oportunidad pa turismo, economia creativo y logistica. Nan tur ta forma parti di e 6 sectornan prometedor cu Gobierno ta trahando riba nan pa por facilita y incentiva pa nan por wordo concretisa.
Cu gran satisfaccion e mandatario a informa e Cumbre tambe cu pa di promer biaha Gobierno a pone un persona na disposicion di San Nicolas Business Association como liasion economico cu e meta pa tene un linea cortico entre SNBA y Gobiernacion. Di e manera aki tur comerciante interesa den San Nicolas y vecindario por wordo atendi y yuda na un manera mas eficiente.
Minister Ruiz-Madiro ta felicita SNBA y tur participante na e Prome Cumbre di Negoshi na San Nicolas y ta spera cu pronto tur e bunita proyectonan por wordo concretisa. Awor ta e ora pa desaroya e potecial di San Nicolas.