ORANJESTAD – Diamars den oranan di atardi minister di Turismo Sr. Dangui Oduber a reuni cu representante nan di San Nicolas Business Association (SNBA) Sr. Nassi, Sr. De Freitas, Sr. Hernandez y Sr. Brooks. E meta di reunion aki ta pa Ministerio di Turismo, ATA y SNBA por yega na un acuerdo unda SNBA tambe ta forma parti den tur e desaroyonan di San Nicolas y proteccion di su identidad, tur esaki por medio di un MOU.
San Nicolas ta den pleno desaroyo y SNBA ta organisando e prome San Nicolas “Business Summit” caminda cu inversionistanan internacional lo ta presente pa asina hunto cu gobierno haci un esfuerso pa yega na solucionnan favorabel pa e comunidad di comercio na San Nicolas y vecindario. Minister Oduber a mustra SNBA riba tur e proyectonan cu ta na caminda pa San Nicolas, proyectonan manera Visitor Information Center remodela, Pier na Rodger’s Beach, Baby Beach Promenade Y Ex Maria Christina school cu lo bira un facilidad di haci recreacion.
Minister Dangui Oduber a duna di conoce cu SNBA tin e deber pa prepara San Nicolas pa haci mihor uzo di tur e desaroyonan cu ta na caminda. Di otro banda SNBA su deseo ta pa e council di turismo pa San Nicolas, resorta bou di nan organisacion pa asina hunto cu Gobierno sigi desaroya y proteha e atraccionnan di San Nicolas. Un reunion frutificero y cu pronto San Nicolas lo conoce hopi desaroyo economico positivo y na mes momento protegiendo tur su atraccionnan natural.
Minister Oduber a mustra SNBA riba e hecho cu Ministerio di Turismo hunto cu ATA ya caba tin palabracion haci pa sigi promociona San Nicolas como “Sun Rise City”. Minister Dangui Oduber ta un persona cu semper ta pone accion tras di su palabranan.