Logrando mas eficiencia, limita uzo di dump y procesa desperdicio den Envoribales
ORANJESTAD, Aruba: For di momento cu EcoGas a tuma e responsabilidad di procesa mayoria (80%) di tur desperdicio di nos isla, mesora publico a nota un cambio drastico. A logra cera e dump di Serlimar na Parkietenbos, limitando e uzo eynan solamente pa desperdicio toxico, manera entre otro di Hospital y sludge procedente di e planta di purificacion di awa. Tur desperdicio residencial y comercial, sea via trucknan di Serlimar, Ecotech of otro companianan di recogemento di desperdicio, ta yega diariamente na EcoGas. Pa por a yega na e acuerdo aki, Minister Otmar Oduber tabata personalmente envolvi, den cual a instrui EcoGas den e contract pa cobra 180 florin pa procesa cada ton.
Despues di hopi decada di un practica anticua y negativo pa medio ambiente, e ultimo aña ta procesa tur sushi, ta recicla locual por uza di nobo y exporta, hero, aluminium y carton, mientras cu ta procesa e demas desperdicio seco den saconan di Envirobales. E RDF (Refuse Derived Fuel) den Envirobales no ta toxico y ta economicamente, socialmente y pa medio ambiente hopi mas favorabel cu otro alternativa di procesa desperdicio na Aruba mes.
Lamentablemente e ultimo dianan aki, na mas di un ocasion, ta scucha Minister menciona cu EcoGas a triplifica e “tipping fee”, locual no ta cuadra cu berdad! E contract entre Serlimar y EcoGas ta un documento publico. Mientras cu di un banda Minister Oduber ta insisti cu ta EcoGas a triplifica e “tipping fee”, por mira claramente na articulo 3. 9 den e contract, cu e Minister a negocia personalmente den nomber di Serlimar, ta stipula cu Ecogas ta obliga pa cobra Afl.180 na tur cliente, incluyendo Ecotech.
Despues di firma e contract cu EcoGas, mesora Minister Oduber a laga cera dump na Parkietenbos pa “tipping” di desperdicio comercial y residencial. Obviamente cu tipping di desperdicio curu sin procesa na Parkietenbos tabata hopi mas barata compara cu separacion di desperdicio pa saca loke por reuza, exporta of empaketa e RDF den envirobales y entrega esaki na Ser’i Tijshi.
Maske Minister Otmar Oduber ta pretende otro, tur documentacion y e propio contract ta confirma cu ta un obligacion contractual pa EcoGas procesa tur desperdicio comercial y residencial y cu ta obliga pa cobra 180 florin pa cada ton.
EcoGas ta convenci di tin e ekiponan, e personal cualifica y un amplio experiencia pa por sigui maneha desperdicio di nos isla, sea ta pa procesa den envirobales pa dera na Ser’i Tijshi of na otro di e cantidad di buraco grandi na Aruba. Preferiblemente por exporta e mesun Envoribalesnan aki pa Colombia, pa eynan uza como combustibel den fornonan di traha cement.
E logro aki, cu awor ta den forma di un MOU y cu pronto den forma di un contract formal, ta “budget neutraal” pa Serlimar, pues ambos ta costa mesun tanto. Esey ta nifica cu pa e mesun prijs, en bes di dera desperdicio procesa (RDF) na Aruba, cu nos por exporta pa Colombia (cu por cierto ta conta cu aprobacion di autoridad Colombiano), no pa der’e eynan, sino pa reuza e mesun producto pero como combustibel, mescos cu nos a haci cu e 1,000.000 ton di pitch (RDF) cu tabata deposita na Grapefield. E pitch aki tambe a wordo exporta como RDF pa Aalborg Cement na Dinamarca como combustibel y awe no ta keda un buraco of un sero di pitch mahos na Aruba.
EcoGas ta un compania netamente Arubiano y ta un subsidiario di MetaCorp. Ey tin 85 empleado local, cu ta traha henter dia pa procesa desperdicio di nos isla den un forma eficiente y profesional.