Durante un conferencia di prensa, sr. Ronnie Maduro a splica cu DIP tin mas o menos 22 producto, pa cual lamentablemente esakinan no ta ‘up to date’, pues tin peticionan entrega pa hopi aña, cu no a wordo atendi cu nan. A base di esey, a tuma e decision alabes reconociendo derecho di ciudadanonan pa percura pa nan peticionnan wordo contesta, pa actualisa e peticionnan aki. Comunidad por a tuma nota di e exito cu tin cu actualisacion di e lista di pre reservacion di tereno, awo ta turno di e partinan di expansion di tereno, erfpacht caduca y erfpacht comercial.
Maneho di Ministerio di Desaroyo Teritorial, Infrastructura y Medio Ambiente ta enfoca riba transparencia poniendo e ser humano central. Directie Infrastructuur en Planning (DIP) tambe ta sigui un maneho dunando oportunidad igual y husto na tur ciudadano. Den cuadro di esaki a inicia cu e proceso dialuna ultimo pa locual ta trata e actualisacion di e lista di peticion di “uitbreiding y erfpacht. Mester bisa cu pueblo a reaciona riba e peticion pa pasa na DIP y ta cumpliendo cu tur e rekesitonan cu ta wordo pidi. Corda cu e accion ta valido te cu 16 di augustus 2019, pa asina actualisa peticionnan cu tin hopi tempo den sistema.
Actualmente tin mas o menos 2000 hende cu desde 1999 bin dilanti a entrega peticion pa expansion. Mayoria biaha ora cu un hende entrega peticion pa expansion, esaki no ta pa mucho tereno, kisas espacio pa un camber extra of un garashi, sr. Ronnie Maduro bisa. Teniendo esaki na cuenta, a manda carta pa e grupo di personanan aki, informandonan cu nan por pasa entre 5 di augustus y 16 di augustus na DIP, pa reinscribi nan peticion cu nan kier e expansion. Unabes confirma cu nan ta interesa den e expansion ainda y nan paga pa esaki, DIP lo por mandanan midi na Kadaster pa despues di 3 luna nan por haya e expansion, sr. Ronnie a splica.