Despues cu Otmar Oduber a purba na rebaha ponencianan di UPP indicando cu lider di UPP lo ta perdiendo conexion cu realidad, nos a duna un analisis di dje, mustrando cu e tin basta complicacion cu su forma con ta trata na hustifica su berdadnan. Nos a mustra e problema cu e tin pa papia e berdad y cu e ta duna muestra di un alto grado di sofismo, unda cu ta purba na trece tur sorto di splicacion cu no tin base pa hustifica “su” berdad. Asina tambe purba manera un demagogo na bruha nos comunidad. A lo largo nos no sa kico mas pa pensa di e figura aki, cu ta parecido di un joker, na Hulandes yama “nar” of “hofnar”, cu den siglonan medio na Europa tabata considera como un persona hopi popular. Pero nos no sa si nos mester hari e Ot-nar aki, of juist yora pa loke e ta cometiendo cu nos pueblo, hincando nos pueblo den mas debe. Ta bunita gaba cu resultado di Standard & Poors, pero e realidad ta cu pa por logra esaki ta pueblo cu no ta invita na ningun fiesta mester a paga cu medidanan y ahustacionnan pa e logro aki. En cambio e minister ta mustra un persona cu Poor Standards.
UPP a desbarata caba, anto documenta, cu loke Otmar Oduber y su ministerio RIOM a trece dilanti, riba e planta di Bouldin & Lawson, cu ta danki na BOYCOT di Benny Sevinger, Mike Eman, Mike De Meza y Alan Howell cu tabata coordinador gabinete AVPOR, e proyecto di 28 miyon FLORIN, y no 30 miyon DOLLARS, manera cu Ot-nar ta pretende, a bay perdi.
Tambe UPP a mustra bon cla cu e “SPROOKJE ” di “Waste to Energy” ta un soño di Otmar Oduber, y cu desde un principio POR a pone esaki dilanti y cu e otro partner di coalicion di gabinete Ot-nar, mester a guli manda abou. A purba di hustifica cu e recomendacion pa un incinerator a bin di e 27 companianan cu a mustra interes na prome instante, loke nos a mustra no ta berdad atravez di e RFI cu gobierno mes a presenta.
Awe nos kier bin ariba e aspecto di inversion di 300 miyon dollar, ken ta paga pa esaki pa e proyecto aki y e sistema di BOO un biaha mas.
Minister Oduber a haya ta bon pa indica cu no sa for di unda lider di UPP a bin cu e suma di 300 miyon dollar pa e incinerator. Nos a mustra claramente caba cu ta trata aki di un suma menciona den rapport Economic Policy di 2019-2022, pag. 48, publica na mei ultimo pa e minister di Finanzas y Economia di gabinete Ot-nar. Ken ta gaña aki anto cu ta 300 miyon dollar? E informacion aki lo ta sali for di e ministerio mes ora traha tipo di rapportnan. Si tin un hende cu a uza diferente suma, anto ta e minister mes. Pa asina hustifica cu e planta lo no costa mucho.
Awor den su defensa ta wordo bisa cu ta e ora cu e companianan entrega nan oferta lo tin un idea kico asina un planta lo sali. Hecho ta cu den un documento oficial di gobierno aki, e suma aki ta wordo menciona.
Un otro punto cu manera un demagogo el a purba di baila rond, ta cu e inversion aki lo no costa pueblo ni gobierno nada, pasobra esaki lo bira un BOO y cu ta esun cu haya e contract ta esun cu ta haci su inversion. (Hasta nos a comprende cu tin un parlamentario lo a declara na un radio local, cu e forma aki di proyecto cu e minister ta presenta lo no costa gobierno niun placa). Pero den nan mesun defensa e ta bisa: “Apenas ora e ofertanan drenta despues di e destaho cu ta sigui awo, lo haya sa kico ta e proposicionnan di e diferente companianan. Cuanto nan lo kier cobra pa e coriente cu mester wordo bendi na WEB y cuanto nan lo kier cobra di “tipping fee” pa haci e proyecto uno RENDABEL (hoofdletter di UPP) pa nan.” Esaki ta e reaccion di 31 di juli ultimo di ministerio di RIOM. Cu otro palabra ta pueblo lo paga p’esaki. Tanto den lantamento di sushi, procesamento di esaki pa crea energia y despues ora bo sende luz na bo cas. Riba 3 di maart 2018 e minister a splica bon cla con e cos aki ta bay. Cu si pueblo no paga pa e procesamento di sushi, esaki lo tin di sali for di belasting, cu alfinal ta pueblo mes ta paga (Solo di Pueblo). Y den un entrevista dia 15 di maart 2018 e ta bisa bon cla: “Links om rechts om, ta pueblo ta paga pe!”
Tambe tabata tin e discusion cu BOO lo no ta PPP. Aki nos ta duna un skema di e posibel formatonan di PPP y BOO ta uno di nan. E ta un forma cu ta keda habri y cu por wordo negocia na final di periodo pa sea un contracto nobo of algo otro. Esaki tambe tin den e RFI pone, cu e contracto lo ta pa 20 aña y despues lo wordo traspasa pa gobierno. Pero bou ki condicionnan? Aki 20 aña nos lo haya sa.
Sinembargo considerando cu Ot-Nar ta usa Poor Standards den su funccionamento pa e por complace cu su sponsornan, nos pueblo un biaha mas lo ser hiba na e altar di sacrificio.
“TA NOS PUEBLO SO POR SALBA NOS PUEBLO, PERO KI DIA MI SEÑOR!!!