Minister di Salubridad Publico sr Dangui Oduber a expresa cu su persona ta sostene y ta kere den e tayer di “Exercise is Medicine”. E tayer aki ta cuadra cu e vision di Ministerio di Turismo, Salubridad Publico y Deporte unda nos ta promove comunidad pa practica deporte, haci ehercicio pa preveni malesanan y hiba un bida saludabel, asina e mandatario a sigui bisa.
E tayer di “Exercise is Medicine” ta pa tur profesionalnan den sector di salud y actividad fysico haya e oportunidad unico pa expande conocemento. Cu e conocemento aki e profesional lo siña nos comunidad cu pa medio di movecion nan por haci cambio na nan estilo di bida y hiba un bida mas saludabel. Na luga di haci uzo di pildo como prome opcion, esaki lo ta un paso grandi den prevencion di malesa y promocion di salud segun e mandatario.
Tayer “Exercise is Medicine” lo tuma lugar diabierna 16 di augustes den Renaissance Convention Center. E evento ta cuminsa pa 7:30 di mainta y ta termina 5 ‘or di atardi. E tayer aki lo wordo duna door di dos doctor specialisa ariba e tereno aki esta Dra Sandra Matsudo-Mahecha y Dr John Duperly. E meta ta pa yuda yega na un mihor salud y tambe un mihor calidad di bida di cada persona cu ta biba na Aruba atraves di actividadnan fysico. Tur aña ta trata na trece mas informacion tocante ehercicio y con esaki ta yuda den e estado fysico y mental di diferente pashent pa asina cu menos remedi alivia nan problemanan.
Minister Oduber ta gradici Fundacion Movemento ta Bida (FMTB),Transition 2 Health y demas stakeholder pa organisa un tayer asina importante pa Salubridad. Minister Oduber a finalisa bisando cu informacion ta hopi importante pa e mehoracion general di e salud di e comunidad den su totalidad y pesei e mandatario no tin duda cu e tayer aki lo wordo bon asisti pa e profesionalnan local.