Diaranson 23 di april, Prome Minister di Aruba, mr. Mike Eman, a tene un reunion cu directiva di Camara di Comercio Aruba (KvK) na Centro di Gobernacion como parti di e creencia firme di Gabinete AVP-Futuro den dialogo como instrumento importante pa por yega na decisionnan cu tin impacto significativo pa Aruba.
Durante e proceso pa forma Gabinete AVP-Futuro, e formadonan a reuni cu varios instancia incluyendo Camara di Comercio. E ultimo aki a haci un apelacion pa por continua cu e reunionan den forma structural unabes cu keda cla cu formacion di e Gabinete nobo. Camara di Comercio ta reconoci pa su rol den e sector comercial, pero a expresa un compromiso pa pensa mas amplio den interes general di Aruba.
Un punto importante riba cual a dialoga durante e reunion, tabata e necesidad pa logra un contribucion mas husto di e sector hotelero na desaroyo di Aruba. Gobierno, segun Prome Minister, no lo impone nada, sino ta propone un dialogo constructivo pa yega na un acuerdo unda e sector por contribui un tiki mas den forma di pago di salario di nan empleadonan pero tambe locual e sector aki ta aporta na caha di Gobierno.
E obhetivo final ta pa stimula un cooperacion duradero entre Gobierno y Camara di Comercio, unda tur sector por asumi su rol den progreso sostenible di Aruba.
