ORANJESTAD – Mike de Meza a informa prensa cu si pa dialuna DIMP no cambia su conseho, cu e lo hiba DIMP, Minister Geoffrey Wever (FUTURO) y Gobierno di Aruba (AVP) corte.
Berdad ta cu de Meza no a cumpli cu ley di screening, cu por cierto a wordo aproba y acepta den parlamento cu 19 voto na fabor incluyendo de Meza su propio voto pro!
Mike de Meza a viola e ley di screening su articulo 8 inciso 1, sub a y sub g.
Violacion 1:
A bin resulta cu pa e por a bira Minister den pasado el a yega na un acuerdo di pago cu DIMP e tempo aya, pues ya tabatin debe cuantioso habri cu Impuesto.
Violacion 2:
El a yega na un acuerdo di pago cual tampoco e no a cumpli cu ne.
Violacion 3:
El a evadi (ontduik) belasting bendiendo un compania cual benta e no a informa DIMP.
Pues Mike de Meza cu pa colmo tabata Ministro di Finansas, esun responsabel pa a hundi Aruba den debe, esun encarga cu DIMP, a viola tur regla di un bon comportacion fiscal ademas di ‘ontduiking’ cu ta un delito penal.
Awe de Meza kier hiba Gobierno di Aruba esta AVP y FUTURO corte, cu ta un indicacion contundente di con pesimo e relacion entre e dos partidonan aki ta. Formador Gerlien Croes a drenta su cueva di silencio hermetico pasobra cu ta conoci cu ta e dos formadornan ta dicidi si Mike de Meza por bira Minister. Y Mike de Meza sa cu ta Mike Eman y Gerlien Croes ta sigui tene na liña.
No lubida cu Mike Eman tambe a faya screening pa transferencianan dudoso di sumanan cuantioso. Pero Gerlien Croes asina mes a permitie bira Minister. Pues ta bisto cu ta e dos formadornan mes ta hungando wega cu de Meza cu e speransa cu e lo cansa y acepta un puesto di director un caminda.
