ORANJESTAD – Diahuebs mainta Hues di Corte di Husticia a dicta sentencia den e caso penal cu Ministerio Publico a cuminsa contra e homber B.E.H.(27), acusa di a ocasiona un accidente cu morto.
ARUBA NATIVE por a compronde cu Hues ta diferencia di opinion cu Fiscal. Hues ta haya cu e brommer BMW tambe tin culpa door di a core hopi duro. Esey a haci cu Hues a conde B.E.H. na castigo hopi mas abao cu loke Fiscal a exigi.
FISCAL TA HAYA CHOFER CULPABEL
Luna pasa, dia 27 di Maart 2025, Fiscal a bisa den Corte cu e ta haya B.E.H. culpabel di a ocasiona e accidente riba 11 October 2023, caminda el a keda sin duna preferencia na un brommer BMW riba LG Smith Boulevard. Door di e impacto, e dama Gutierez, sinta patras riba e brommer, a sufri herida severo y a muri riba 15 October 2023. E chofer di e brommer Lyendrick Kelly a sufri lesion.
Fiscal ta haya cu aki no por papia cu intencional B.E.H. a causa e accidente sino cu door di su culpa e accidente a sosode. Fiscal a exigi 2 aña di prison pa B.E.H., di cual 30 luna ta condicional cu 2 aña di prueba. Tambe Fiscal a exigi pa kita B.E.H. su rijbewijs pa 3 aña. Fiscal a bisa cu e ta laga Hues dicidi riba e demanda di daño di 30 mil florin.
DECISION DI HUES
Awe mainta den sala di Corte por a mira e mayornan di e victima Gutierez y e sospechoso B.E.H. a presenta cu su mama.
Hues a bisa cu riba video di seguridad, por a mira cu B.E.H. a lora mientras cu e brommer tabata bin den direccion contrario cu velocidad halto. E brommer tabata core 137 km pa ora siendo cu riba e caminda mester core 50 km. E acusado B.E.H. tabata bao influencia di alcohol. Hues ta haya cu mescos cu Fiscal y abogado, B.E.H. no tabata core irresponsabel.
Na opinion di Hues, e velocidad halto di brommer a causa cu B.E.H. a bira keriendo cu e brommer lo tabata bin mas poco poco. Hues a declara B.E.H. liber di a core irresponsabel y causa e accidente. Hues a bisa cu e ta haya B.E.H. culpabel di a core bou influencia y causa un accidente cu a causa morto di un dama.
CASTIGO MAS ABAO CU LOKE FISCAL A EXIGI
Hues a bisa cu e no ta sigui Fiscal den su exigencia y lo condena B.E.H. na castigo mas abao. Pa cu e asunto di daño material, Hues ta haya cu esaki ta mucho complica pa keda trata den un caso penal y ta declara esaki no admisibel. Esey ta haci cu por cuminsa un caso civil.
Hues a condena B.E.H. na 350 florin di boet of 7 dia encarcela, pa a pone trafico den peliger. Tambe Hues a condena B.E.H. na 1000 florin of 20 dia sera, pa a ocasiona accidente bou influencia di alcohol. Hues a condena B.E.H. na 6 luna sin rijbewijs pero esaki condicional cu un tempo di prueba di 2 aña.
Hues a sigui bisa cu e 70 dianan cu B.E.H. tabata sera, mester desconta for di e boetnan. Na opinion di Hues, B.E.H. no tin cu paga nada di boet. Hues tambe a ordena pa debolbe e auto di B.E.H. cu ta confisca.
