Diaranson dia 23 di april, directiva di Camara di Comercio y Industria di Aruba (KvK) a asisti na un reunion importante cu Prome Minister mr. Mike Eman na Cocolishi. Den e reunion aki, Presidente di KvK, sr. Diederik Kemmerling, a enfatisa e rol esencial cu e organisacion di KvK tin den desaroyo economico di Aruba, representando mas cu 16 mil negoshi cu ta activo.
Kemmerling a expresa cu KvK ta mas cu solamente un registro pa comerciante; Camara di Comercio ta sirbi como un plataforma pa brainstorm riba e retonan real cu sector priva ta enfrenta, y ta busca hunto cu su miembronan, solucionnan sostenibel. Ta comunica e posibel solucionnan aki na Gobierno pa por trece mehoracion cu impacto positivo pa tur hende.
Un di e preocupacionnan cu a adresa, ta e impacto cu por surgi cu e cantidad grandi di camber cu lo bin acerca den e lunanan nos dilanti. Esaki lo crea un necesidad urgente pa importa un cantidad grandi di trahado, locual por trece un peso extra riba e infrastructura basico, entre otro riba e sistema di Waste Water Management na Bubali Plas. Segun Kemmerling, esaki ta exigi un solucion urgente y duradero.
Durante e dialogo, a trata tambe topico di energia berde, cu ta un prioridad tanto pa Gobierno como pa sector priva. Tin base comun entre e plan di gobernacion di coalicion AVP–Futuro y e strategia cu KvK ta propone, basa riba e deseonan di e empresa y negoshinan cu nan ta representa.
Locual a sobresali durante di e reunion ta un sentimento di cooperacion y compromiso pa eleva Aruba na un nivel mas halto, cu un enfoke na solucionnan sostenibel, desaroyo economico y bienestar pa tur cuidadano.
