Nationaal Instituut voor Budgetvoorlichting (Nibud) di Hulanda ta realisando un estudio pa haya un mihor comprension di e educacion financiero y sosten cu mester pa residentenan di Aruba. Nibud ta un centro di conocemento y conseho ariba di e tereno di finansas na cas. Cu resultado di e estudio aki, Nibud kier mira si por haci uzo di nan conocemento y experiencia pa yuda personanan structuralmente cu asuntonan financiero.
Ultimo anjanan Nibud a haci estudionan na e islanan Bonaire, St. Eustatius y Saba tocante desaroyo di e poder di compra y kiko ta un entrada minimo aceptabel.
Den cuadro di estudio na Aruba, Nibud a realisa un bishita di trabao na Aruba. Durante e bishita di trabao a bishita diferente organisacion cu pa medio di nan trabao ta trata cu e tema aki.
131 Aruba tawata un di e organisacionan na Aruba cu a ricibi bishita di Nibud, pa asina nan por a haya un bista di e contactonan cu 131 Aruba por a ricibi for di mucha, hoben y adolescente na Aruba tocante e tema aki. Nubid a ser representa pa Marion Weijers y Karin Radstaak, y nan a ser ricibi door di e director di 131 Aruba, James Sneek.
Durante e bishita na 131 Aruba a elabora ariba e motibo di contactan cu 131 Aruba sa ricibi pa cu e tema di finansas na cas. Tambe a trata e instrumentonan cu 131 Aruba ta haci uzo di dje pa asina duna e mucha, hoben, mayor y profesional informacion preventivo tocante diferente tema.
E representantenan di Nibud a keda satisfecho cu e informacion brinda y impresiona cu e trabao di 131 Aruba.
Pa mas informacion tocante e trabao di 131 Aruba por tuma contacto via nos website: 131.aw, Instagram: Instagram: 131aruba, facebook: https://www.facebook.com/aruba.131, email: 131aruba@gmail.com of telefon 5886138/ 5884011.
