ORANJESTAD – Awe 22 di April ta dia di Mama Tera. Aruba tin ecosistemanan hopi varia, paisahenan robusto, di nos Parke Nacional Arikok te na e bida marino den nos awanan protehi, y ta importante pa tur e tesoronan aki wordo conserva.
Parlamentario Evelyn Wever-Croes a indica cu 59% di Aruba ta areanan protehi, na unda no ta permiti ningun clase di construccion. E naturaleza di pais Aruba ta hopi bunita y particular, y ta nos responsabilidad como ciudadano di e pais aki pa cuid’e.
Con abo como ciudadano di e pais aki por yuda? Tin varios manera con por yuda na conserva y proteha nos naturaleza.
4 Punto importante;
- Uza menos plastic posibel
- Sostene iniciativanan local di conservacion di nos naturaleza
- Sea un boluntario pa limpiesa di nos beachnan (beach clean–up)
- Percura pa siña mas y siña otronan tocante Aruba su biodiversidad unico
Si cada un di nos duna di nos banda y sigui e 4 puntonan importante aki, nos naturaleza lo ta protehi dunando nos asina e oportunidad di por goza di dj’e pa hopi aña nos dilanti.
Aruba ta di nos tur, y Aruba mester di nos tur!
