Cu hopi tristeza SV Estrella ta anuncia morto di Sr. Luciano Martino Croes miho conosi comi Wichi, na bida un deportista, dirigente y un consehero deportivo exepcional.
Wichi tabata hunga como portero pa Estrella den anan 60 na un edad hopi jong. Como dirigente Wichi a fungi den bestuur di Estrella seccion futbol pa basta aña.
Wichi tabata presidente di hoofdbestuur di SV Estrella den final di decada 90.
Despues di esey Wichi a keda como consehero di Estrella , y na varios ocacion Wichi su conseho nan tabata conseho nan di ‘oro’ pa e organisacion. Wichi tabata tin un amplio conosemento di reglamento nan di AVB.
Wichi ta miembro honorario di SV Estrella.
Wichi tambe a forma parti di AVB for di: 1984 te cu 1992 como Secretario General y Comisario di AVB.
Alavez sr. Wichi Croes a forma parti di Comision di Apelacion te cu December 2019. Despues di Status Aparte Wichi Croes tabata un persona importante pa futbol di nos isla y tabata un di esnan cu a pasa den tur e procesonan pa Aruba por a haya reconocimento internacional y bira miembro di FIFA y CONCACAF na 1988. (info Sr. Fico Vrolijk).
Sin lubida cu Wichi tabata president di ASU tambe pa un periodo.
Sin duda Wichi tabata un dirigente cu a hasi su trabou cu hopi dedicacion y amor. Wichi tabata un persona hopi integro , humilde y cu karakter suave unda su amabilidad tabata resalta.
SV Estrella lo bay haya su falta ja cu e ta laga un bashi enorme den e mundo Deportivo y tambe sigur pa su famia y e famia grandi di Estrella.
Diamars 22 April pa 1:00 pm E restonan mortal di Sr. Wichi Croes lo pasa na veld di Estrella pa despues bay Misa Imaculada Concepcion di Santa Cruz.
Bestuur di SV Estrella ta manda un palabra di profundo condolencia na famia di Wichi Croes y cu Wichi sosega na pas.
