ORANJESTAD – Diabierna mainta Hues a dicta sentencia den e caso penal cu Ministerio Publico a cuminsa contra Gregory Junior Zuleta Rave (22), sospecha di a mata Corniel Tejada riba 3 Juli 2024 den un cas den Pindastraat. Hues no ta haya Zuleta Rave culpabel di a mata sino cu Zuleta Rave a actua den defensa propio.
ARUBA NATIVE por a compronde cu Hues no a bay di acuerdo cu e exigencia di Fiscal di 9 aña di prison. Hues a declara Zuleta Rave liber.
Dia 14 di Maart 2025, dia di tratamento di e caso, Fiscal a bisa cu e ta haya Zuleta Rave culpabel di a mata Corniel Tejada y a exigi 9 aña di prison.
Diabierna mainta, Zuleta Rave y su abogado mr. Canwood a presenta den Corte pa scucha e sentencia.
Hues den su evaluacion di e caso a bisa cu ta sospecha Zuleta Rave di a mata Tejada door di dal’e cu algo na su cabez. Hues a bisa cu el a studia e procesverbaal di Polis cu ta mustra cu dia 3 Juli 2024, Polis a bay na Pindastraat pa un pelea. Polis a yega na e cas y a mira Tejada drumi abao for di tino y hendenan tabata scop cosnan cu tabata benta abao, un banda. E momento ey Zuleta Rave a bay serca Polis y a bisa: “mi a dal’e cu un pia di stoel pasobra el a saca un cuchiu pa mi”.
NO CULPABEL DI ASESINATO
Hues a bisa cu for di declaracion di testigonan por conclui cu 3 Juli 2024, Tejada a bay na cas di Zuleta Rave y tabata hopi agresivo y tabata grita.
Tejada a drenta e cas caminda Zuleta Rave tabata. A surgi un discusion entre Junior y Tejada, caminda Junior a bisa Tejada pa bay for di e cas. Tejada no a sali, sino a bay den cushina di e cas y a coy un cuchiu grandi y bay riba Zuleta Rave. Zuleta Rave a coy un stoel y tira esaki riba Tejada. Door di esey, un pia di e stoel a kibra.
Tejada a bay for di e cas y a bolbe cu e cuchiu den man y a bay atrobe riba Zuleta Rave cu tabata para na entrada di e cas. E ora ey Zuleta Rave a coy e pia di stoel y dal Tejada den cabez y Tejada a cay abao.
Hues ta conclui cu Zuleta Rave a dal Tejada cu pia di stoel na e parti robez di Tejada su cabez. Esaki a causa fractura na e craneo di Tejada.
DEFENSA PROPIO
Hues a bisa cu e ta comparti punto di bista di tanto Fiscal como abogado mr. Canwood, cu no por papia di asesinato. Hues ta haya cu Zuleta Rave a causa maltrato severo cu a causa e morto di Tejada.
Hues a mustra cu abogado mr. Canwood a mustra riba actua den defensa propio. Hues ta haya cu Zuleta Rave tabata den un situacion cu e mester e defende su mes, contra Tejada cu tabata cu cuchiu. Hues a bisa cu e no ta haya cu Junior tabatin chens di por a core bay.
Hues no ta haya Zuleta Rave culpabel y a declar’e liber di a haci un hecho castigabel. Hues a rechaza e demanda di daño di parti di famia di Tejada.
