ORANJESTAD [25 di maart 2025] – Marriott Aruba Surf Club cu orguyo ta anuncia cu recientemente a ricibi e premio Top Performer F&B pa di dos aña consecutivo. Competiendo entre 22 propiedad prestigioso den e region di Florida y Caribe, e reconocemento aki ta re afirma nos compromiso cu excelencia den servicio, hospitalidad y e experiencia di e cliente.
Gana e premio aki pa dos aña tra’i otro ta un testimonio di e dedicacion di nos ekipo y di e experiencianan excepcional cu nos ta brinda nos huesped tur dia. Nos exito ta basa den un mehoracion continuo, capacitacion riguroso y un pasion incansabel pa hospitalidad.
Compromiso cu Excelencia: Strategia Tras di e Exito
Pa logra e resultadonan extraordinario aki, e ekipo di Marriott Aruba Surf Club a implementa diferente strategia pa garantisa un servicio di prome nivel. Nos bartendernan a ricibi formacion avansa den nan tereno pa mehora eficiencia y satisfaccion di e cliente. Ademas, nos uni na companianan specialisa den ofrece capacitacion riba servicio na cliente na nos ekiponan di Captains Galley y Market Place.
Nos dedicacion na compromiso cu nos huespednan ta bay mas leu di capacitacion. Nos ta implementa programanan strategico di upselling y ta crea experiencianan memorabel por medio di activacion tematico na ocasionnan special manera Super Bowl, St. Patrick’s Day, Dia di Betico, Dia di Himno y Bandera y Dia di San Valentin. Fuera di nos programanan structura, nos ekipo ta ehempel di calidad humano den hospitalidad, fomentando relacionnan duradero cu nos propietario y huespednan, sigurando cu nan ta sigui bishita nos bunita isla.
Mensahe di Danki pa nos Ekipo
E logro aki no ta djis un premio; e ta un refleho di e trabou y dedicacion di henter nos team. “Danki pa brinda un servicio excepcional cada dia. Boso compromiso y pasion pa hospitalidad ta refleha naturalmente ora nos traha hunto manera un gran ekipo. Ban sigui mantene e spirito increibel aki!” – Ryan Bareño.
Cu bista pa 2025: Buscando un Tripeat
Cu dos victoria consecutivo, na Marriott Aruba Surf Club nos ta convenci di por logra un di tres na 2025. Pa sigui eleva e experiencia di nos huespednan, nos tin un plan emocionante di renobacion den nos restaurant y cushina. E mehoracionnan aki lo permiti nos perfecciona ainda mas nos servicionan y consolida nos reputacion como un destino di prome nivel den e region.
Nos ta sinti nos mes honra di ricibi e reconocemento aki y nos ta re afirma nos compromiso cu un hospitalidad sin comparacion. Ban brinda pa otro aña di excelencia y pa e meta di un tripeat na 2025!
