Dialuna 14 di april, Minister di Husticia, mr. drs. Arthur Dowers, a haci un bishita oficial na Centro di Husticia na Macuarima den cuadro di un celebracion significativo pa Cuerpo Policial di Aruba (KPA). Durante e acto, Alto Comisario Ramon Arnhem a oficialmente devela un “Wall of Fame” cu ta honra esnan cu a sirbi comunidad di Aruba cu pasion y dedicacion den funcion como miembro di polis, desde nos Status Aparte.
E “Wall of Fame” ta un iniciativa di Cuerpo Policial cu ta rindi honor na cada un cu a guia y dirigi e Cuerpo cu integridad desde e comienso di su existencia como KPA. Ademas, a devela un segundo “Wall of Fame” pa honra specificamente tur Alto Comisario cu a ocupa e cargo mas halto den liderazgo di KPA durante e añanan.
Minister Dowers a expresa su aprecio profundo pa e esfuersonan di Cuerpo Policial di Aruba pa reconoce y celebra esnan cu a carga e responsabilidadnan di e institucion den tur circunstancia, tanto den tempo di logro como den retonan di dia. Esaki ta un homenahe mereci pa esnan cu a dedica nan bida na proteccion di nos comunidad, desde e rango mas abao te cu e liderazgo mas halto.
E acto di reconocemento ta refleha un compromiso continuo pa fortalece e dignidad di nos Cuerpo Policial y pa preserva su historia y legado, como pilar di nos sistema di husticia y di nos comunidad Arubano.
