“Cu esnan cu a fayece por haya bida eterno cerca Señor y cu Señor duna consuelo na tur e sernan keri di e fayecidonan”
ORANJESTAD – Diabierna utlimo a tuma luga na Plaza Juan Pablo Duarte un bunita ceremonia pa conmemora esnan cu a perde nan bida den e tragedia e siman aki na Club Jet Set na Republica Dominicana. Parlamentario Evelyn Wever-Croes hunto cu demas coleganan tabata presente na e ceremonia aki pa demostra solidaridad cu e pueblo Dominicano aki na Aruba.
Parlamentario Wever-Croes den nomber di Partido Movimiento Electoral di Pueblo MEP y den nomber di e pueblo di Aruba, ta extende nan sincero condolencia na e comunidad Dominicano akinan na Aruba, na Republica Dominicana y na henter mundo.
E tragedia aki, cu a afecta mundo henter, a costa bida di mas di 200 persona. Na Aruba semper tabata tin un solidaridad grandi entre e comunidad local y e comunidad Dominicano y pa cu esaki e comunidad di Aruba ta manda nan palabranan di hopi forsa den e momentonan difícil aki pa e comunidad di Republica Dominicano.
“E dolor ta uno inmenso y nos no por kita e dolor di esnan mas afecta, pero cu nos presencia, pensamento y atencion, ohala nos por trece consuelo. Cu Dios bendiciona tur esnan cu ta pasando den e dolor aki y bendiciona e comunidad di Dominicanonan. Cu esnan cu a fayece por haya bida eterno cerca Señor y cu Señor duna consuelo na tur e sernan keri di e fayecidonan. Semper den pensamento y oracion cu e comunidad Dominicano” Parlamentario Wever-Croes a expresa.
