Minister di Salud Publico, Asunto Social, Cuido di Adulto Mayor y Cuido di Adicto, minister drs. Mervin Wyatt-Ras a cuminsa cu un bishita oficial na e oficina principal di Departamento di Asunto Social (DAS) situa na Lagoen Weg, cu ta den su fase final di renobacion.
Durante e bishita, Minister Wyatt-Ras a haya un presentacion detaya di e trahadonan cu ta traha den e “tweede lijn” y ta esnan cu ta atende casonan cu ta yega cerca nan via di scol, otro instancia social y hasta dokter di cas. Como un ex-trahado social na DAS, Minister Wyatt-Ras conoce e rol crucial, cu e segundo linea di cuido tin den atencion integral pa esnan den necesidad den nos comunidad.
E segundo linea ta un pilar esencial den e structura social. E ta e portal pa esnan cu ta lucha cu reto educacional, financiero cu ta culmina den stress y psicosocial. E trahadonan di DAS ta traha cu pasion y hopi creatividad, a pesar di e limitacion di fondo y e complehidad di e casonan cu nan ta enfrenta. E recorido a sigui na e filial di DAS na San Nicolas, actualmente situa den e edificio di ex-Centro Medico dr. Rudy Engelbrecht, cu segun plan lo bay Savaneta, na altura di La Granja, pa un facilidad mas espacioso, central y accesibel.
Durante e bishita a subraya cu e sinergia entre e “prome linea” y “segundo linea” ta fundamental pa un atencion social eficaz. E casonan cu ta drenta cu peticion pa bijstand, asistencia psicosocial of cu necesidad di orientacion specialisa, ta canalisa eficazmente pa haya atencion integral den colaboracion cu instancianan manera GGZ y otro entidad social.
Minister Wyatt-Ras a subraya cu e maneho social di e gobierno AVP-Futuro ta enfoka riba creacion di un sistema cu ta conecta tur instancia relevante den cuido y bienestar.
Locual ta hopi cerca den Minster Wyatt-Ras su curason ta e atencion pa e gruponan vulnerabel, particularmente muchanan special entre e edad di 0 te 16 aña, cu hopi biaha no ta haya sosten suficiente. E muchanan mester proteccion, y e mayornan mester haya mas espacio pa cuida nan yiu cu necesidad special.
Gobierno ta comprometi pa sigui traha riba un sistema social fuerte, inclusivo y orienta riba bienestar humano. A traves di compromiso firme y colaboracion estrecho, lo por logra un Aruba mas solidario pa tur ciudadano, sin laga ningun hende atras.
