Oranjestad, 11 di april 2025 – Minister di Finansa, Asunto Economico y Sector Primario, Geoffrey Wever, a tene su prome reunion oficial cu Sr. Ricky Croes, director di Departamento di Aduana. E encuentro ta parti di e compromiso continuo di ministerio pa fortifica colaboracion cu institucionnan clave den sistema economico y administrativo di Aruba.
Durante e reunion, a trata diferente punto importante cu tin impacto directo riba comercio y maneho di fluho di producto cu ta drenta nos pais. Entre otro, e tema di facilitacion di trabou di douanero, mehoracion di proceso, y reduccion di tramitacion innecesario (“red tape”) a wordo discuti primordialmente. E meta ta pa crea un sistema duanero cu ta mas eficaz, digitalisa unda necesario y cu por brinda e miho servicio posibel pa tanto consumidor como comerciante.
“Cuerpo di Aduana Aruba tin un rol vital den controla kico ta drenta nos pais y pa asegura cu tur hende ta paga nan fair share. Pero e rol no ta limita solamente na control; e servicio tambe mester wordo facilita. Comercio no por florece optimalmente si procedimento di importacion ta tarda of ta innecesariamente complica,” minister Wever a indica.
Ministerio di Finansa lo traha cerca cu Douane Aruba pa analisa e proceso actual y busca manera pa “streamline” e operacion, pa por logra un balansa entre control eficiente y promove un ambiente comercial agil y competitivo.
“Cuerpo di Aduana di Aruba tin empleadonan publico profesional y capaz pa eherce nan trabou cu etica y deber. Den e periodo nos dilanti, tin diferente trabou cu nos mester eherce den colaboracion cu otro. Mi tin confianza den Aduana su capacidad y den nos habilidad pa colabora y logra mehoracionnan pa comunidad durante Gabinete di AVP-Futuro”, minister Geoffrey Wever a declara.
E reunion ta e comienso di un trayecto di cooperacion activo entre ministerio y Cuerpo di Aduana, cu ta crucial pa nos pais cu ta depende fuertemente riba importacion, pero tambe ta desea pa sigui stimula su produccion y comercio local.
