Consehera principal di Mike Eman sra Astried ‘VIES’ ta pidi pa tuma medida contra DIMP
Parlamentario Endy Croes ta siguiendo e desaroyo di e screening di Mike de Meza basta di cerca. Mike de Meza ta den un disputa cu Departamento di Impuesto como cu por a compronde cu el a ontduik belasting y tin un debe habri di aparentemente mas di 500 mil florin. Mike de Meza lo a bay busca placa presta na un banco na Corsou pa asina e por deposita un suma gigantesco na DIMP pa reduci e debe y trata na yega na un areglo pa e restante. Tur esaki pa e logra bira minister. Sigur esaki no ta un bunita ehempel di un ex minister di Finansas di AVP.
Sra Astrid VIES e consehera di Mike Eman a manda advertencia
Nos a tuma nota riba Facebook di Astried VIES e consehera number un di Prome Minister Mike Eman y porcierto un candidato fuerte di Mabon cu a score 28 voto e ultimo eleccion, a manda un misil riba Departamento di Impuesto (DIMP). Den su post y conseho na Prome Minister Mike Eman sra Astried VIES a conseha Mike Eman pa haci un peticion na minister Geoffrey Wever pa pone ordo den DIMP. Den su conseho di alrededor 4 pagina Sra. Astried VIES ta splica cu gobierno mester investiga entre otro si tin grupo di hende den DIMP ta echando baina y kier stroba gobernacion di AVP-Futuro. Segun e consehera di Mike Eman sra. Astrid VIES, si mester constata cu tin hende kier stroba Mike de Meza pa bira minister of tin hende kier stroba gobernacion aki, mester actua mesora y tuma medida contra nan. Consehera principal di Mike Eman number 25 riba lista di AVP sra. “Astrid ShareenVIES” a continua splicando cu mester tuma medida y saca appelnan putri for di DIMP. Nos a keda babuca lesando e conseho aki. Astried VIES ta termina su conseho bisando cu Mike de Meza ta hopi clave pa e gobernacion aki y pa San Nicolas y no ta importa si e debe belasting. Si e debe belasting mes ta algo personal di dje cu DIMP, Sra. Vies ta splica. Parti di su advies por wordo aprecia riba su propio Facebook “Cu Astrid Bisa Mi” di fecha di 9 di April 2025.
Hendenan di Mike de Meza poniendo presion den partido AVP
Nos a tuma nota di varios postnan riba Facebook di e sostenedornan di Mike de Meza poniendo presion riba Mike Eman y tambe Gerlien Croes. Nos por corda cu Mike de Meza NO a vota pa Gerlien Croes bira presidente di Staten 8 di januari ultimo. Esaki sigur Gerlien no lo lubida. Tabata tin un anochi reunion na San Nicolas di De Meza su sostenedornan. Mike de Meza den un entrevista a explota bisando “Mi ta hopi fada”. Na mesun momento nos ta puntra fada cu ken? Cu AVP, cu Gerlien of cu DIMP? Shon ta abo a keda sin paga belasting y pues kisas bo no mester ta fada pero bo mester tin berguensa y cuminsa pidi pais Aruba un despensa. Mike Eman recien tabata tin contacto cu Richard Arends y tin den su agenda scondi pa laga Richard Arends tuma e carteranan di Mike de Meza pa un aña y asina duna Mike De Meza espacio suficiente pa fix su debenan. Richard Arends tampoco ta awa limpi ya cu den gobernacion Eman 1 y 2 el a cobra 4 miyon florin via su propio compania Horizon Consultancy pa coseha RDA, Utilities y gobierno di Aruba. Sostenedornan di Mike de Meza a expresa “over my dead body” como cu Richard Arends no a bay eleccion y no tin voto y sigur no tin sosten di San Nicolas. AVP diaranson mainta a bolter cos y a laga Benny Sevinger cay den Parlamento mientras AVP ta den un disputa cu Mike de Meza y su hendenan. Segun caya ta papia cu Stephany y Mike de Meza ta actualmente manera 2 boonchi den un baliña y hunto ta presionando partido AVP. Manera semper nos ta bisa nos no ta mete den problemanan interno di partido pero pa goberna e pais aki mester si di hendenan integro y drechi y no hendenan cu debe belasting di e forma aki y kier culpa otro pa su propio erornan!
