Den un paso strategico y determina, Minister di Turismo, Transporte y Labor, mr. Wendrick Cicilia a convoca su prome reunion representando Gobierno como accionista mayoritario cu e Raad van Commissarissen (RvC) di Aruba Airport Authority N.V. como parti di un dialogo constructivo y orienta riba solucion duradero. Durante e reunion Minister Cicilia a tene un sesion cu Interim Management Team (IMT) pa haya un update di e situacion actual y ricibi varios opinion clave tocante disputa andando cu Royal Schiphol Group (RSG).
Minister Cicilia a enfatisa cu e iniciativa aki ta forma parti di un vision strategico cu ta busca pa mantene y fortalece e relacion cu Royal Schiphol Group. E proyectonan andando manera Gateway 2030 tin un balor financiero considerabel y ta depende riba experticio y conocemento specialisa cu Schiphol Group ta ofrece.
Schiphol Group como un lider mundial den maneho di aeropuerto tabata crucial den e supervision tecnico y experiencia desde e inicio di Gateway 2030 te na implementacion di fase 1A. Minister Cicilia a reconoce cu sin e apoyo constante y direccion tecnico di Schiphol, e proyecto por a enfrenta e retrasonan considerabel.
Aruba mester orienta pa un futuro den cual ta sigui cosecha beneficio di un colaboracion cu un socio di caliber mundial. E enfoke di Gabinete AVP-Futuro ta cla: busca un win-win situation den relacion cu Reino Hulandes caminda Aruba ta desaroya riba un fundeshi di respet mutuo y beneficio comparti. E reactivacion di e cooperacion cu Royal Schiphol Group ta un movecion clave pa gana bek e confiansa y compromiso di un aliado crucial den mundo di aviacion, incluso di e institutonan financiero cu ta inverti den e proyecto.
Gobierno ta compromete pa consolida Aruba su posicion como hub regional, no solamente den turismo pero tambe den aviacion. Pa logra esaki mester traha cu e socionan cu tin e red global y experticio necesario.
