Aunke hopi laat mi tabata contento cu nos a continua cu tratamento di presupuesto di pais Aruba pa aña 2025 y cu esaki finalmente a keda aproba. Cu e aprobacion aki Parlamento a empodera gobierno pa por cumpli cu e.o., nos obligacionnan financiero, sigui haci inversionnan necesario y sigui brinda na pueblo e servicio y sosten necesario. E presupuesto di pais Aruba a keda aproba unanimamente cual ta algo unico pa nos pais mirando cu ta trata un presupuesto traha y presenta pa MEP.
Pueblo mester sa cu e espacio financiero, e surplus crea, no ta danki solamente na trabou di ministernan, tambe e tabata trabou grandi di nos profesionalnan y trabou duro na e recuperacion di nos pais di sector publico y priva. Trabounan cu a keda lidera pa nos Minister President Evelyn Wever-Croes.
Cua ta e cambionan cu a beneficia abo como ciudadano?
Ta bon pa remarca cu Parlamento a ricibi 3 nota di cambio. Kico ta nota di cambio? Esaki ta un cambio cu Gobierno ta haci den su presupuesto. Nos a ricibi un dia 11 di februari, un dia 6 di maart y e ultimo dia 28 di maart ora e tratamento a start. Den e comunicado aki mi kier trata esun ricibi dia 11 di februari. Den e Nota di Cambio aki Gobierno a informa parlamento di e cambionan cu a surgi desde cu e presupuesto a keda presenta inicialmente dia 29 di augustus 2024 y e ahustacionnan haci abase di esakinan. Algun cos cu a bini dilanti ta ahustacion di e cifra di crecemento economico mas reciente di Departamento Economico y tambe e impacto di e rebaho di porcentahe riba impuesto di entrada cu a tuma lugar na inicio di 2025. Un rebaho cu a beneficia pueblo grandemente ta: un persona cu ta gana 5400 pa luna of menos no ta paga belasting mas. Esaki ta traduci su mes na un total di 12 mil hogar cual ta 16 mil persona cu no mester paga loon of inkomstenbelasting mas. Diesdos (12) mil persona lo paga 3493 florin menos pa aña na inkomstenbelasting y por ultimo di 19 mil pensionado, 17 mil no ta pagando belasting mas.
Minister President actual no ta contento cu abo ta cobra mas
Mi a indica cu dia 7 di maart nos a scucha nos Prome Minister actual, e dia ey Lider di Fraccion di AVP, papia over pobresa, trece perpectiva bek, mehora poder di compra y toch, mescos cu mi, pueblo a keda preocupa cu persona no tabata nada contento cu e decision di Gabinete Wever-Croes. Esaki no obstante e realidad cu e decision di rebaho di impuesto a brinda alivio y of adelanto na asina tanto famia y persona na Aruba.
Mike kier a stop e decision y pone bo bay paga belasting bek!
Mi a haya necesario pa indica cu mi ta haya interesante pa sa kico minister Mike Eman ta pensa y si enberdad ainda ta core e pensamento pa trek e decision aki terug. Mi mester informa cu den Parlamento a keda bisa pa Gabinete Croes-Eman cu e decision aki no lo bay keda ingetrokken. Pa mi esey ta e informacion mas importante. Cu e otro lider di e Gabinete a sali pa bruha tera over e base legal di e decision, mi ta kere cu mi colega di fraccion Xiomara Maduro a conteste cla y raspa y a bise bon cla pa stop di haci spetakel pornada. Enberdad e mester traha riba su madures politico y siña reconoce ora otronan ta traha na bienestar di pueblo. Realidad ta cu pa ley Minister di Finansas ta autorisa pa a tuma e decision cu a beneficia nos hendenan grandemente.
Como pueblo bo tin derecho pa exigi Gabinete nobo pa inverti den bo, placa tey.
Presupuesto 2025 sigur ta muestra di trabounan financiero serio y responsabel cu a crea e espacio financiero necesario pa por duna bek na pueblo. Lastimamente gobierno a cay na september aña pasa. Pero un cos pueblo mester ta consciente di dje: TA DANKI na e espacio finaciero crea pa Gabinete Wever-Croes, awe Gobierno Croes-Eman lo tin placa pa inverti y maneha e pais aki. Contrario na con nan a laga e caha atras na 2017. Pueblo por conclui cu MEP NO A GOBERNA PA E SIGUIENTE ELECCION, MEP A GOBERNA PA E SIGUIENTE GENERACION!
