ORANJESTAD – Diamars ultimo Parlamentario pa fraccion di MEP Evelyn Wever-Croes a reuni cu Secretario di Estado Zsolt Szabó den Parlamento di Aruba, hunto cu presidente di parlamento y demas lidernan di fraccion den parlamento.
Durante e reunion señor Szabó a indica cu su prioridad pa cu e islanan ta pa tin bon gobernacion, finansas solido, y cu e paisnan ta para riba nan propio pia. Tambe el a menciona e tema di e rijkswet y e landspakket cu ta temanan cu Gabinete Wever-Croes a trata hopi aña cu Hulanda. Tambe el a indica cu e debe di covid mester wordo paga bek, y cu no lo transforma e debe aki den un subsidio of fondo di inversion. Hulanda ta dispuesto pa yuda si, pero atraves di e landspakket manera semper nan a indica.
Parlamenttario Wever-Croes a indica cu esaki sigur ta importante pa comunidad, mirando cu e partidonan cu awor ta den gobierno a haci promesanan cu awe no por cumpli cu nan. Un fondo di inversion por bin cune ki ora cu ta, Gabinete Wever-Croes a laga tur cos cla pa esey. Pero Hulanda na e momento aki lo no contribui den e fondo ey.
Tambe Parlamentario Wever-Croes tabata tin un encuentro separa cu señor Szabó mirando cu nan no tabata tin e oportunidad di a oficialmente despedi y gradici otro pa tur e añanan di cooperacion. E añanan cu Evelyn Wever-Croes a traha hunto cu e ministerio di BZK, no tabata facil pero a logra si na yega na cosnan grandi pa pais Aruba.
“Di nan banda tambe nan a gradicimi pa tur e cooperacion, e profesionalismo, pa tur loke mi a significa pa Reino, pero tambe den relacionnan internacional representando Reino den otro paisnan. E tabata un bon encuentro, y mi ta deseanan hopi exito den e tempo nos dilanti. Pa loke ta mi persona, mi ta hopi orguyoso pa tur e trabou haci durante e ultimo añanan y tur loke nos a logra apesar di temponan hopi difícil” Parlamentario Wever-Croes a expresa.
