Minister di Finansa, Asunto Economico y Sector Primario, Geoffrey Wever, a tene su prome reunion semanal cu Directie Financien dialuna ultimo. E reunion aki ta marca e comienso di un “werkwijze” structural pa fortalece coordinacion y monitoreo continuo riba e asuntonan financiero di pais Aruba.
Minister Wever lo reuni cu Directie Financien tur dialuna mainta, cu e obhetivo pa evalua y discuti e topiconan principal financiero cu tin impacto pa pais, incluyendo:
- Maneho y planificacion di cashflow
- Maneho di e debe publico
- Supervision financiero y cumplimento cu regla di normanan presupuestario
- E presupuesto nacional y su ehecucion
- Continuacion di ehecucion di e landspakket y su impacto operativo
- Desaroyonan macro-economico local y internacional y nan impacto riba finansa publico y otro asuntonan relaciona cu maneho financiero y stabilidad economico
Minister Wever a enfatisa cu den un contexto internacional cu ta cambia constantemente, e manera mas efectivo pa mantene control y transparencia ta mediante coordinacion frecuente y evaluacion tecnico.
“E situacion economico global ta exigi di nos pa ta alerta y pa por adapta. Reunionan structural cu Directie Financiën ta fundamental pa nos por traha riba un base di dato actual y pa tuma desicion informa. Asina nos ta sigui traha pa un Aruba mas solido y sostenibel,” Minister Geoffrey Wever a indica.
Ministerio di Finansa lo sigui informa regularmente riba cualkier desaroyo cu ta sali for di e reunionan aki.
