“Mi ta sumamente orguyoso como Arubiano di mira Mr. Jane Jansen, como hende muhe ocupa e funcion importante aki”
ORANJESTAD – Diabierna ultimo durante un sesion di corte special Mr. Darcy Jane Jansen a wordo instala como Vice Presidente di Corte Comun di Husticia, di Aruba, Corsou, Sint Maarten y islanan BES. Cu e instalacion di Mr. Jansen, tanto e presidente Mr. Mauritsz de Kort y e Vice Presidente awor ta Arubiano.
Durante e sesion importante aki, tanto e Presidente y e Vice Presidente di Corte a indica cu Corte Comun di Husticia mester di expansion di capacidad y di fondo, mirando cu e trabounan ta expandiendo. Tambe nan a enfoca hopi riba bienestar di e trahadonan.
“Mi ta comparti e preocupacionnan aki. Pa loke ta ampliacion di personal y presupuesto, mi tad i opinion cu e anja aki, mirando e surplus grandi cu nos a laga atras, mester aloca mas fondo pa Corte por eherse su trabou. Esey ta e motibo tambe cu pami ta incomprendible con e gobierno por a corta hustamente den husticia. E bienestar di nos miembronan di Corte mester haya prioridad, especialmente mirando expresionnan negativo contra huesnan cu semper den caso cu ta trata politiconan”, lider di fraccion di MEP a expresa.
Procurador General Interino, durante di su disertacion, tambe a expresa su preocupacion pa cu e falta di fondo y personal pa ministerio publico. Tambe el a enfatisa cu Ministerio Publico (OM) no ta haci politica cu ningun caso pero simplemente ta aplica ley.
“Mi ta sumamente orguyoso como Arubiano di mira Mr. Jane Jansen, como hende muhe ocupa e funcion importante aki. Y mi ta desea Mr. Jansen, e dos huesnan nobo cu a instala y henter corte hopi exito” Parlamentario Evelyn Wever-Croes a expresa.
