Parlamentario Endy Croes a tuma nota di desaroyonan interno den e Gabinete Eman-Wever-Croes unda lo tin e intension di schuif ex minister di AVP Richard Arends aden pa ocupa e posicion vacante di Minister y asina benta San Nicolas y Mike de Meza afor. No por bisa con esaki lo cay pa e pueblo di San Nicolas como cu Richard Arends no tabata riba lista tampoco a aporta na ningun voto pa AVP por ta bek den gobierno. Cu Mike de Meza debe hopi belasting y no a logra yega na un areglo di pago pa asina kisas bira minister ta conoci pa pueblo. Bo mester ta hopi sinberguensa como ex minister di finansas kende a duna ordo pa cobra tur comerciante y pueblo belasting entre aña 2010 -2014 pa awor bin resulta cu bo mes no tabata paga belasting. Pero den partido AVP, e universidad di corupcion, tur cos por. Paul Croes 3 luna sera den KIA a keda cobra su salaris di minister siendo un ambtenaar normal bay KIA mesora DRH ta conseha pa para su salaris. Benny Sevinger 90 dia sera den KIA cobrando ful salaris y pa recompens’e, AVP ta lage bay riba lista (2021) y asina por sigui e trent di partido AVP. Awe nos por mira e resultado di e bagamunderianan di AVP cu a tuma lugar. Entre otro Hues ta ordena Benny Sevinger (Avestrus) pa paga 840 mil bek na pais Aruba banda di a kita (encauta) 2.4 miyon riba e account di ORCO Bank na Corsou. Placanan horta di pais Aruba. Placa di nos hendenan!
Richard Arends tampoco ta awa limpi!
Nos a repasa poco den e historia di Richard Arends y ta keda toch babuca di su trackrecord. Richard Arends na aña 2009 tabata consehero di Mike de Meza. Na 2010 Richard Arends su compania Horizon Consultancy a cuminsa cobra pa consehonan den Utilities y despues na RDA. Na aña 2014 Richard Arends a haya un full time contract cu gobierno di Afl.16.000 pa luna. Banda di esaki su compania Horizon Consultancy tambe tabata cobra cientos di miles pa duna conseho. Despues di corto tempo Richard a ripara con Speed y Patrick sin ningun estudio tabata strica entre 80 y 125 mil florin pa luna cu Tera Group y entre otro 24ora.com via gobierno di Aruba.
Richard ta cambia su contract di 16 mil pa cobra 25 mil pa luna
E abuso di Speed cu Patrick a pone e luz cende cerca Richard Arends. Asina Richard Arends a kibra su arbeidsovereenkomst di 16 mil pa luna cu Gobierno y a sera un contract nobo mas lucrativo via su compania Horizon Consultancy pa un bunita suma di 25 mil florin pa luna pa conseha Mike Eman y Mike de Meza. Na 2016 Horizon Consultancy a cuminsa duna conseho tambe na RDA. Dia 1 di november 2016 Richard Arends a firma un otro abeidsovereenkomst pero e biaha aki directamente cu RDA como CFO di RDA na balor di Afl.22.750,- pa luna mas diferente beneficio cu ta alcansa 30 mil pa luna. Adicional un clausula, si kier retir’e for di trabou mester pag’e Afl.2.6 miyon florin. Dia 30 di november 2016 Richard Arends a huramenta como minister despues cu Otmar Oduber a bandona filanan di AVP. Su contract como CFO na RDA a keda valido. Riba mesun fecha cu el a huramenta como minister (30 di november 2016), Richard tabata duna autorisacion y haci pagonan grandi di cientos di miles pa RDA online siendo minister. Nos a yega di publica e pruebanan aki. Dia 27 di October 2017 Richard Arends a bira Parlamentario. Nos por a pone man riba dos notulen firma pa Mike de Meza unda RDA ta duna Richard verlof manteniendo su trabou di CFO cu salario di 30 mil pa luna te ora e caba di sirbi Aruba como Parlamentario e lo tuma e encargo na RDA bek. Only in Aruba! Foei Mike de Meza!
Richard a cobra 4 miyon florin
Rapportnan di e investigacionnan ta ilustra cu banda di tur esaki Richard Arends via su Horizon Consultancy a cobra Afl.585.000,- mil pa consehonan duna na Utilities y Afl. 445.000,- pa conseha RDA. Toko den Toko. Un total di 4 miyon a wordo paga na Horizon Consultancy un compania di Richard Arends ex minister di AVP. Despues cu a pone hopi presion riba AVP y Richard Arends dia 28 di augustus 2018 Richard Arends a manda un carta pa Promer Minister Evelyn Wever Croes cu e ta distancia su mes di dicho contract di Afl.30 mil pa luna como CFO di RDA. Nos kier recorda pueblo ken ta Richard Arends di AVP. Pa locual ta e guerra interno den AVP entre Richard Arends y Mike de Meza nos ta laga esey pa sostenedornan di AVP atende cu esaki. Pero un cos si nos tur por conclui, y esey ta cu tur ta mescos. Haragan pa placa!
