Oranjestad, Aruba – 8 di april 2025 – Aruba Airport Authority N.V. (AAA) a cuminsa cu e
“soft opening” di su terminal nobo di check-in pa vuelonan Mericano awe, marcando e comienso di un transicion pa e facilidad nobo.
E prome vuelo cu a check-in na e terminal nobo tabata e vuelo di Delta Air Lines DL1761, saliendo for di Aruba pa Boston. E pasaheronan a ricibi asistencia door di un team di boluntarionan di AAA cu tabata presente den henter e area pa guia nan y garantisa un proceso trankil durante e fase inicial aki.
E apertura di awe a inclui operacionnan di check-in pa Delta, United, Spirit y Southwest Airlines. JetBlue y American Airlines ta programa pa transiciona pa e terminal nobo riba dia 29 di april, cu ta e momento cu e terminal lo bira completamente operacional.
Mientras cu esaki ta marca un paso importante pa sigui engrandece e experiencia di pasahero, Aruba Airport Authority ta reconoce cu, mescos cu cualkier transicion di e escala aki, algun ahuste y reto operacional lo por surgi den e proximo dianan. AAA ta keda enfoca riba traha estrechamente cu su partnernan y personal pa atende cu cualkier reto y ahuste rapidamente y efectivamente.
A ricibi e pasaheronan cu a check-in awe cu musica di steelpan y cos dushi local pa recorda e momento. A diseña e experiencia pa duna un caluroso bonbini y yuda guia e biaheronan segun cu nan ta cera conoci cu e diseño y fluho nobo.
“Esaki ta un periodo di transicion, y nos ta aprecia e pasenshi y cooperacion di nos pasaheronan, personal y partnernan segun cu nos ta traha den e fasenan inicial di operacion di e terminal nobo”, asina Jurgen Benschop, Chief Operations Officer na Aruba Airport Authority N.V, a menciona. El a continua bisando cu: “Nos ta comprometi pa entrega un experiencia sin problema y amistoso pa pasahero y ta vigila cada paso cuidadosamente pa garantisa mehoracionnan continuo.”
“E ‘soft opening’ aki ta refleha e compromiso y coordinacion di hopi stakeholder interno y externo, specialmente nos partnernan di aerolinea, nos ‘ground handlers’ y US CBP”, asina Barbara Brown, Chief Revenue Development & Communications na Aruba Airport Authority N.V, a expresa. El a agrega cu “Nos ta spera di por sigui cu un colaboracion fuerte mientras cu nos ta prepara pa e transicion completo e luna aki.”
E terminal nobo di check-in ta parti di e inversion di largo plaso di Aeropuerto di Aruba den mehora eficiencia, capacidad y calidad di servicio en general—no solamente p’e biaheronan cu ta bay Merca, pero den futuro pa tur pasahero cu ta haci uzo di nos aeropuerto.
Pa informacion detaya tocante e diseño nobo di e terminal y e proceso di check-in, incluyendo un video, por fabor bishita: www.airportaruba.com/new-us-check-in
Pa update, bishita www.airportaruba.com of sigui nos riba nos medionan social.
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na mas cu 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
