Otmar Oduber, Presidente di e Comision di Ouderenzorg (Cuido pa nos grandinan) a comenta riba un reunion cu e tabatin cu dos instancia durante cual hopi informacion a bin dilanti.
Ta trata di e departamento encarga cu maneho di Ouderenzorg y e organizacion OPPA. Un di e temanan riba cual a enfoca, cual ta algo cu ya caba tabata sinti, ta e preocupacion cu tin pa cu e trato, cuido y calidad di bida di nos grandinan.
Den clausura di e reunion Oduber a bisa cu si no pone atencion debido, nos lo ta creando un time bomb, mientras cu departamento di Ouderenzorg a pidi pa Parlamento mas pronto cu ta posibel pone prioridad riba e topico aki.
No ta trata solamente di e uitkering cu mester wordo aumenta y riba cual a haci un compromiso di 700 Florin y ta bay duna solamente 250 Florin. Aki 15 aña e problema lo bay ta 4 biaha mas grandi cu loke e ta na e momentonan aki pa loke ta costo di cuido di nos grandinan. E departamento di Ouderenzorg ta bisa cu si kier atende cu e cuido di nos grandinan awe, tin mester di un suma di 102 miyon Florin pa aña, pero e suma aki den 15 aña lo bira casi 400 miyon Florin pa aña si no actua of haci nada na e momentonan aki.
Ademas di esaki tin e problema di espacio na centronan di cuido pa nos grandinan, tin un lista di espera largo cu lo bira 4 pa 5 biaha mas largo den e proximo 10 pa 15 añanan y esaki ta significa cu e infrastuctura total ta bay bira un problema tambe.
Mientras tanto, colega parlamentario Sr. Goeloe cu tin experiencia cu Wit Gele Kruis a indica cu tin e situacion di vergroening tambe cu tin na Aruba, esta cu tin menos baby naciendo pa aña. “Esaki ta crea e perfect storm dentro di maneho pa loke ta trata nos grandinan, paso awendia 3 persona y mei ta paga e pension pa cada adulto mayoy por bai cu pension y den futuro sercano esaki lo bira 2 persona y mei pa cada pensionado,” Otmar Oduber a indica.
Mientras tanto, OPPA a indica cu pa añanan nunca nan a wordo invita pa e comision den Parlamento. “Awe como Presidente di e comision nos a inicia trabounan pa tur fraccion por haya informacion pa di e forma ey nos por cuminsa atende na un forma serio, responsabel y sin haci politica, e situacion aki cu ta birando un perfect storm y ta creando un time bomb pa loke ta maneho di nos grandinan”, Otmar Oduber a conclui.
