Recientemente Amstel Academie di Amsterdam UMC na Hulanda a tene e graduacion oficial pe profesionalnan cu a caba nan estudio specialisa di ‘Sedatie Praktijk Specialist’ (SPS). Un funcion unico y nobo pa Aruba y hasta pa Caribe Hulandes, cu excepcion di Boneiro. Un momento special unda cu dos anesthesiemedewerker di Horacio Oduber Hospital (HOH), Indra Poulina y Denise Laclé a logra specialisa y awo a bira sedacionista. Den un sala na HOH Academy hunto cu famia, diferente colega y management coleganan Denise y Indra a gradua den forma digital hunto cu otro alumnonan na Hulanda. Un momento di alegria cu a sigui despues cu un bunita celebracion.
Sedacionista ta..
Graduado Denise Laclé ta conta: “Como anesthesie medewerker bo ta traha den e sala di operacion, semper cu e anestesiologo pero como un sedacionista bo por duna sedacion sin tin mester di e anestesiologo presente.” E proceso ta inicia na momento cu un specialista ta rekeri sedacion pa un pashent y ta haci peticion pa esaki cerca un sedacionista. E ora ta screen e pashent y sigui e protocolnan y preparacion pa duna sedacion. Pues, e specialista awo por amplia e dunamento di servicio medico na pashent den HOH door di e posibilidad nobo aki. Y den futuro kizas te hasta esaki por sosode na e policlinica di specialista mes.
Necesidad
E anestesiologonan a ripara cu na HOH tin un necesidad pa haci mas procedura cu ta rekeri sedacion. Despues cu a papia cu e specialistanan nan a trece e idea pa dilanti pa bin cu un “sedatie praktijk specialist”, esta sedacionista, y asina hunto cu e departamento di recurso humano a inicia e proceso y a saca un vacatura. Indra Poulina ta splica cu “Tur “anesthesie medewerker” diploma por a solicita pa haci e specialisacion y asina ami cu mi colega Denise a solicita y a wordo scogi pa haci e specialisacion aki cu a dura un total di 1 aña.
Experiencia
Indra cu Denise a sigui e parti di teoria digitalmente hunto cu e alumnonan di Hulanda y e parti di practica nan por a haci aki na Aruba mes guia pa sedacionistanan diploma di Hulanda. Mirando cu e ta algo nobo na Aruba nan a logra core stage pa un siman na Boneiro caminda nan por a aplica sedacion na pashent di gastroenterologia. Tambe nan a bay Hulanda pa un luna caminda nan por a haci e practica cerca diferente pashent di tur tipo di specialisacion pa asina haya mas experiencia prome cu bolbe Aruba y duna sedacion riba nan mes. “E tabata un aña duro, di hopi trabou, pero tambe un tremendo experiencia”, Indra a conta cu un sonrisa. Nos ta gradici nos coleganan, management, famia y tur cu a yuda y pusha nos di un of otro manera pa nos logra nos meta.
Inverti den educacion pa empleadonan ta un di e pilarnan grandi cu ta aporta na e meta pa eleva calidad di cuido cu ta na beneficio di tur nos pashentnan. Hunta di Directiva ta orguyoso di Denise y Indra y ta contento cu’n otro paso mas den loke ta mehora servicio y calidad di cuido medico pa Aruba henter. Masha pabien Denise y Indra cu e bunita logro aki!
FIN
