Oranjestad, 3 di April 2025, Riba 2 april 2025 Hues a dicta sentencia den e caso cu Ducapro a entama contra Q-Waves/Hits100FM.
Den e caso aki e Fundacion Ducapro a pidi Hues pa prohibi Q-Waves/ Hits100FM toca musica den aire di artista of autor representa pa Ducapro y a demanda pago di AWG.250,– pa cada biaha cu Q-Waves/Hits100FM actua encontra di e prohibicion. Despues di e tratamento di e caso, Ducapro a expande nan peticion y a demanda pa duna Q-Waves/Hits100FM permiso pa toca musica den aire di artista y of autor representa pa Ducapro bao condicion cu Q-Waves/Hits100FM ta paga Ducapro un percentahe di locual nan ta genera.
No ta den discusion cu Q-Waves/Hits100FM ta haci uzo di musica cual artista y of autor tin derechon riba dje. Partidonan ta compronde cu un pago na e artista of autor pa toca e musica den aire ta na su lugar.
Sinembargo ta un echo cu Radio Emisoranan na Aruba ta haci uzo di e musica di artistanan of autor ya for di hopi tempo y e peticion di Ducapro ta un medida hopi drastico cu no por wordo aplica sin mas.
Na fin di aña 2023 Ducapro a acerca Q-Waves/Hits100FM cu e mensahe cu nan mester cuminsa paga pa haci uzo di musica cual artista y of autor nan tin derecho riba dje. Desde e tempo ey partidonan a drenta den discucion tocante, entre otro, e suma rasonabel pa cu esaki. Partidonan no ta comparti e mesun opinion tocante e factornan economico di e mercado local cu mester tuma den consideracion y ademas Q-Waves/Hits100FM no ta comodo compartiendo nan informacion financiero y administrativo cu Ducapro sin regulacion of siguransa di confidencialidad.
Hues ta opina cu e obhecionan aki di Q-Waves/Hits100FM no ta irasonabel, en especial considerando cu Ducapro ta unilateralmente demanda pago sin tene cuenta cu e circumstancianan local y sin base den ley local.
Un prohibicion pa toca musica tin consecuencia severo pa Q-Waves/Hits100FM como radio emisora. Considerando e tempo limita bao cual partidonan tawata den discusion, Hues ta haya e peticion mucho drastico. Ademas tin varios otro radio emisora cu tambe ta haci uzo di musica cual artista y of autor tin derecho riba dje y cu tampoco no ta paga p’e.
Pa locual cu ta trata e demanda adicional di Ducapro pa Q-Waves/Hits100FM paga un percentahe di locual nan ta genera na Ducapro, Hues ta opina cu no ta na su luga den un tratamento sumario manera esun aki. Pa defini e ganashi di un emisora y determina e percentahe rasonabel partidonan lo mester acudi na un experto. Hues mientrastanto no tin niun motibo pa stipula un suma cu den su opinion ta rasonbel pa Q-waves/Hits100FM paga na Ducapro.
Pa es motibo Hues a nenga e peticion di Ducapro y ta determina cu Ducapro mester paga e gasto legal di Q-Waves/Hits100FM.
Sr. Aldrich Croes Director di Q-Waves-Hits100FM a keda satisfecho cu e sentencia di Hues y a gradici abogado Gabriela Sjiem Fat pa defende nan den e caso.
