ORANJESTAD – Awe mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra Benny Sevinger. Hues ta haya Benny Sevinger culpabel.
ARUBA NATIVE por a compronde cu Hues a rechaza defensa di abogado mr. D.Kock y tambe a reduci e castigo exigi pa Fiscal.
RECHAZA DEFENSA DI ABOGADO
Benny Sevinger a presenta den Corte di Husticia pa scucha su sentencia, hunto cu abogado mr. D.Kock. Hues a bisa cu Fiscal a pidi pa trata e caso mientras cu abogado mr. D.Kock ta haya cu segun ley, no por bay condena Benny Sevinger, tanten cu no tin sentencia definitivo di Corte Supremo. El a pidi Hues pa warda cu e caso en todo caso tuma un decision te ora tin un decision di Corte Supremo.
Hues a bisa cu Corte Superior riba 12 Juli 2024, a haya ex minister Benny Sevinger, den caso Avestruz, culpabel y a conden’e na 48 luna di prison. Ademas Hof di Corte Superior a kita e derecho pa Benny ta un ambtenaar.
Hues ta di opinion cu contrario na mr. Kock, tin decision di Corte Supremo cu ta mustra cu por tuma decision mientras cu ta warda riba decision di Corte Supremo. Hues a rechaza e defensa di mr. Kock.
DECISION DI HUES
Ta asina cu durante tratamento di e caso di kita propiedad di Benny Sevinger, Fiscal a exigi pa Benny paga mas di 191 mil florin di malversacion di placa.
Hues a bisa cu el a bay evalua tur e calculacionnan haci y ta yega na un otro conclusion cu Fiscal. Envez di 910 mil florin, Hues ta yega na 840.051,91 florin.
Hues a condena Benny Sevinger na paga 840.051,91 florin na Gobierno. Hues a sigui bisa cu si Benny Sevinger no paga, e lo mester bay 900 dia sera den prison.
