Ta scoge si pa corta den enseñansa, sector social y husticia
Algun siman pasa ora nos a trece pa dilanti cu Gabinete Eman 3 ta bay corta 10% den tur departamento, Prome Minister Eman y Minister Gerlien Croes a sali bisa cu esaki no ta berdad. Nan a indica cu e recorte ta referi na recorte na e bureau di Ministers so.
No ta bay corta 8.5 miyon na bureau di ministers aworaki
Durante tratamento di presupuesto Minister Geoffrey Wever a presenta un nota di cambio caminda ta saca e recorte di 8.5 miyon florin na bureau di ministers afor. A puntra mesora kico ta e motibo pa laga esaki afor awor, mirando cu nan mes a campaña cu esaki y cu nan a bisa cu e recorte no lo ta den departamentonan pero na e bureau di Minister. Minister Geoffrey Wever a contesta cu mester haci un mihor analisis.
Ta corta si den enseñansa, husticia y sector social
Pa introduci un recorte mesora den husticia y e sector social cu 6.2 miyon florin no tawata tin mester di analisis. Pa corta 2.9 miyon florin den enseñansa no tawata tin mester di analisis. Y tampoco tawata tin mester di analisis pa kita 20 miyon florin pa traha cas social y asina tambe baha huur pa esnan cu ta biba den cas di FCCA.
Pa conclui
Nos ta lamenta e excusanan cu ta wordo duna pa no inverti den e diferente sectornan. Si bo no sigui aloca fondo, manera nos a bin ta haci durante e ultimo Gabinetenan Wever-Croes, esaki lo causa mas problema pa futuro y conseceuntemente e lo costa mas placa tambe.
