ORANJESTAD, Aruba – 31 di Maart 2025: Cu vision y compromiso, Gabinete AVP-FUTURO ta tuma e responsabilidad pa trece bida bek na nos edificionan historico. Nos pasado ta e fundeshi di nos futuro, y preserva nos patrimonio ta esencial pa honra e legado di nos isla.
Awe nos ta mira un paso significativo cu e restauracion di ex-Reina Beatrix School, un simbolo di progreso y orguyo nacional. E edificio aki ta para como testimonio di nos dedicacion pa rescata, conserva y duna balor na nos historia.
Mientras cu trabounan di mantencion a inicia pa recupera e edificio cu a wordo reconoci como un edificio monumental caba, mi persona como Minister encarga cu Educacion, Hoben y Innovacion conhuntamente cu Promer Minister di Aruba, Sr. Mike Eman, a reuni cu Monumenten Bureau Aruba (MBA) y Stichting Monumentenfonds Aruba un rato pasa. Hunto cu nan nos lo sa di explora oportunidad y posibilidad pa restauracion a corto plaso.
No obstante cu tin algun temanan huridico tumando luga, Gabinete AVP-FUTURO lo sa di haci su maximo esfuerso pa recupera y rescata e edificionan aki tambe como tal pa rescata patrimonio di pueblo.
Gradicimento na TUR instancia y coleganan minister pa e union y trabou nan cu ta ser ehecuta.
Hunto, nos ta traha pa un Aruba cu ta honra su pasado mientras ta wak cu speransa pa su futuro.
